మధ్యంతర ఎన్నికల్లో డెమోక్రాట్లు గెలిస్తే ‘మిస్టర్ వీటో’గా మారతా - ట్రంప్‌

ఇరాన్‌తో ఉద్రిక్తతలు, ఇతర దేశాలతో సంఘర్షణల నేపథ్యంలో అమెరికా అధ్యక్షుడు డొనాల్డ్‌ ట్రంప్‌పై ప్రజల్లో వ్యతిరేకత పెరుగుతున్నట్లు పలు సర్వేలు వెల్లడిస్తున్నాయి. ఈ పరిస్థితులపై స్పందించిన ట్రంప్‌.. రాబోయే మధ్యంతర ఎన్నికల్లో డెమోక్రాట్లు మెజారిటీ సాధించి కాంగ్రెస్‌పై పట్టు సాధిస్తే తాను ‘మిస్టర్‌ వీటో’గా మారాల్సి వస్తుందని హెచ్చరించారు. డెమోక్రాట్లు ప్రవేశపెట్టే బిల్లులను తిరస్కరిస్తానని, తన అధికారాలను పరిమితం చేయడానికి వారు చేసే ప్రయత్నాలను అడ్డుకుంటానని అన్నారు. చివరకు వారే చర్చల కోసం తన వద్దకు రావాల్సి వస్తుందని వ్యాఖ్యానించారు. తన పాలనలో అమెరికా ఆర్థిక వ్యవస్థ చరిత్రలోనే అత్యుత్తమ స్థాయికి చేరుకుందని పేర్కొన్నారు. రిపబ్లికన్లకు ఉన్న మద్దతును సర్వేలు సరిగ్గా అంచనా వేయడం లేదని అసహనం వ్యక్తం చేశారు. మరోసారి అధ్యక్ష పదవికి పోటీ చేయడానికి సిద్ధంగా ఉన్నానని, అయితే రాజ్యాంగ నిబంధనలు అందుకు అడ్డంకిగా మారవచ్చని అన్నారు.

మరోవైపు, గూఢచర్యం విషయంలో చైనా, రష్యా కంటే అమెరికా మెరుగ్గా పనిచేస్తోందని ట్రంప్‌ పేర్కొన్నారు. అమెరికా సైనిక స్థావరాలపై చైనా, రష్యా నిఘా పెట్టాయని, అదే సమయంలో వాషింగ్టన్‌ కూడా బీజింగ్‌, మాస్కోలను నిరంతరం పర్యవేక్షిస్తోందని చెప్పారు. ఇదిలా ఉండగా, అమెరికా మధ్యంతర ఎన్నికలు ముగిసిన వెంటనే ఇరాన్‌పై దాడులు ప్రారంభించాలని ఇజ్రాయెల్‌ ప్రధాని బెంజమిన్‌ నెతన్యాహు ట్రంప్‌ను కోరినట్లు సమాచారం. అయితే, ఇరాన్‌తో ఒప్పందం కుదుర్చుకునేందుకు ప్రస్తుతం శాంతి చర్చలను కొనసాగించడమే తన అభిమతమని ట్రంప్‌ పేర్కొన్నారు. శనివారం ఇరువురు నేతలు ఫోన్‌లో ఈ అంశంపై మాట్లాడుకున్నట్లు తెలుస్తోంది.