జగన్‌ను కలిసేది పెళ్లి ఆహ్వానం కోసమే: షర్మిల

ఏపీ కాంగ్రెస్ అధ్యక్షురాలు వైఎస్ షర్మిల తనపై జరుగుతున్న రాజకీయ ప్రచారాన్ని ఖండించారు. తాను ఎవరినో కలిశానని, మరో పార్టీలో చేరబోతున్నానంటూ సోషల్ మీడియాలో జరుగుతున్న ప్రచారం పూర్తిగా నిరాధారమని స్పష్టం చేశారు. వైసీపీ అధ్యక్షుడు వైఎస్ జగన్‌మోహన్‌రెడ్డిని తాను చివరిసారిగా తన కుమారుడు వైఎస్ రాజారెడ్డి వివాహానికి ఆహ్వానించిన సమయంలోనే కలిశానని తెలిపారు. ఇప్పుడు మళ్లీ కలిసినా తన కుమార్తె వైఎస్ అంజిలి రెడ్డి వివాహానికి ఆహ్వాన పత్రిక అందించేందుకే కలుస్తానని చెప్పారు.

అన్ని రాజకీయ పార్టీల అధినేతలను తన కుమార్తె వివాహానికి ఆహ్వానించి, నూతన వధూవరులను ఆశీర్వదించాలని కోరడం సాధారణ విషయమేనని షర్మిల పేర్కొన్నారు. శుభకార్యాన్ని రాజకీయాలతో ముడిపెట్టి తన రాజకీయ విశ్వసనీయతను, ప్రజలు తనపై ఉంచిన నమ్మకాన్ని దెబ్బతీసే ప్రయత్నాలను సహించబోనని అన్నారు. తన కుమార్తె అంజిలి రెడ్డి, సోమల రఘురామ్ రెడ్డి వివాహ వేడుకకు తెలుగు ప్రజలంతా హాజరై నూతన దంపతులను ఆశీర్వదించాలని ఆమె కోరారు.