ఖైరతాబాద్‌ ఉప ఎన్నికలో భాజపాదే విజయం - కిషన్‌రెడ్డి

దానం నాగేందర్‌ అనర్హత కేసులో సుప్రీంకోర్టు తీర్పును బీజేపీ నేతలు స్వాగతించారు. పార్టీ ఫిరాయింపుల నిరోధక చట్టం ఉల్లంఘనపై వెలువడిన ఈ తీర్పు కాంగ్రెస్‌, భారాసలకు చెంపపెట్టు వంటిదని కేంద్ర మంత్రులు జి. కిషన్‌రెడ్డి, బండి సంజయ్‌ వేర్వేరు ప్రకటనల్లో పేర్కొన్నారు. దానం నాగేందర్‌ అనర్హతను సమర్థిస్తూ తెలంగాణ హైకోర్టు ఇచ్చిన తీర్పులో జోక్యం చేసుకోవడానికి సుప్రీంకోర్టు నిరాకరించిన విషయం తెలిసిందే.

కిషన్‌రెడ్డి మాట్లాడుతూ.. గతంలో కాంగ్రెస్‌ ఎమ్మెల్యేలను భారాసలో చేర్చుకుని మంత్రులుగా చేసిన కేసీఆర్‌ ప్రభుత్వంపై, అలాగే భారాస ఎమ్మెల్యేను కాంగ్రెస్‌లో చేర్చుకుని ఎంపీగా పోటీ చేయించిన ప్రస్తుత ప్రభుత్వంపై విమర్శలు చేశారు. ఖైరతాబాద్‌ ఉప ఎన్నికలో ప్రజలు రెండు పార్టీలకు సమాధానం చెబుతారని ఆయన అన్నారు. బండి సంజయ్‌ మాట్లాడుతూ.. దానం వ్యవహారంలో కాంగ్రెస్‌, భారాసలు తీర్పును తమ విజయంగా చెప్పుకోవడం హాస్యాస్పదమన్నారు. పార్టీ ఫిరాయింపులను ప్రోత్సహించే పార్టీలకు ఇది గుణపాఠమని పేర్కొన్నారు. బీజేపీ శాసనసభాపక్ష నేత ఏలేటి మహేశ్వర్‌రెడ్డి, రాష్ట్ర అధ్యక్షుడు ఎన్‌. రామచందర్‌రావు కూడా తీర్పును స్వాగతించారు. రాజ్యాంగానికి ఎవరైనా తలవంచాల్సిందేనని రామచందర్‌రావు అన్నారు.