ఏపీలో స్థానిక ఎన్నికలపై నారా లోకేశ్‌ కీలక వ్యాఖ్యలు

ఆంధ్రప్రదేశ్‌లో స్థానిక సంస్థల ఎన్నికలు ప్రజాస్వామ్యబద్ధంగా జరుగుతున్నాయనడానికి మున్సిపాలిటీల్లో 22,800కు పైగా నామినేషన్లు దాఖలవడమే నిదర్శనమని మంత్రి నారా లోకేశ్‌ అన్నారు. అన్ని వర్గాలు, వివిధ రాజకీయ పార్టీలు, రాష్ట్రంలోని అన్ని ప్రాంతాల నుంచి అభ్యర్థులు ఎన్నికల్లో పోటీ చేసేందుకు ముందుకొచ్చారని పేర్కొన్నారు. ఎన్నికల ప్రక్రియపై ముందుగానే ఆరోపణలు చేస్తున్నవారు ఈ విషయాన్ని గమనించాలని సూచించారు.

ఎన్నికల్లో గెలుపోటములను నిర్ణయించేది మీడియా సమావేశాలు కాదని, ప్రజాక్షేత్రమేనని లోకేశ్‌ వ్యాఖ్యానించారు. ఈ వ్యాఖ్యల ద్వారా వైకాపా అధ్యక్షుడు వైఎస్‌ జగన్‌ విమర్శలకు ఆయన పరోక్షంగా సమాధానమిచ్చినట్లు కనిపిస్తోంది. రాజకీయ నాయకులు ప్రజల వద్దకు వెళ్లి తమ వాదనలను వినిపించాలని, చివరికి ప్రజలే తమ ఓటు ద్వారా తీర్పు ఇస్తారని లోకేశ్‌ స్పష్టం చేశారు.