స్థానిక ఎన్నికలపై సుప్రీంకోర్టును ఆశ్రయించిన వైఎస్సార్‌సీపీ

ఆంధ్రప్రదేశ్‌లో స్థానిక ఎన్నికలను తుది ఓటర్ల జాబితా వచ్చిన తర్వాతే నిర్వహించాలని వైఎస్సార్‌సీపీ సుప్రీంకోర్టును ఆశ్రయించింది. స్థానిక ఎన్నికలను వాయిదా వేయాలని తాము కోరడం లేదని, తుది ఓటర్ల జాబితా ఆధారంగానే ఎన్నికలు నిర్వహించాలని అభ్యర్థిస్తున్నామని పార్టీ తరఫు న్యాయవాదులు కోర్టుకు తెలిపారు. 2026 జనవరి 1 నాటి ఓటర్ల జాబితాను ప్రాతిపదికగా తీసుకోకూడదని కోరారు. అలా చేస్తే పెద్ద సంఖ్యలో అర్హులైన పౌరులు ఓటుహక్కును కోల్పోయే అవకాశం ఉందని, స్వేచ్ఛాయుత, నిష్పాక్షిక, పారదర్శక ఎన్నికలకు విఘాతం కలిగే అవకాశం ఉందని వాదించారు.

వార్డుల పునర్విభజనకు సంబంధించి హైకోర్టు ఇచ్చిన ఉత్తర్వులపైనా వైఎస్సార్‌సీపీ అభ్యంతరాలు వ్యక్తం చేసింది. ఈ అంశంపై శుక్రవారం భారత ప్రధాన న్యాయమూర్తి నేతృత్వంలోని ధర్మాసనం విచారణ చేపట్టనుంది. తుది ఓటర్ల జాబితా అందుబాటులోకి వచ్చే వరకు స్థానిక ఎన్నికల సన్నాహాలను ముందుకు తీసుకెళ్లడం సరికాదని పార్టీ తన వాదనల్లో పేర్కొంది.