బిగ్ బాస్‌లో ఉండగానే అమన్ మసూద్ మూవీ ట్రైలర్ రిలీజ్..

పాయల్ చెంగప్ప ప్రధాన పాత్రలో నటించిన ఫీమేల్ ఓరియెంటెడ్ థ్రిల్లర్ ‘మయూఖ’ ట్రైలర్‌ను హైదరాబాద్‌లో గ్రాండ్‌గా విడుదల చేశారు. శ్రీ తేజ్ ఎస్.కె. దర్శకత్వం వహిస్తున్న ఈ చిత్రాన్ని ప్రశ్విత ఎంటర్‌టైన్‌మెంట్ బ్యానర్‌పై శశిధర్ నల్ల నిర్మించారు. ఈ సినిమాలో బిగ్ బాస్ ఫేమ్ అమన్ మసూద్, దేవ్ డి, మురళీధర్ గౌడ్ తదితరులు కీలక పాత్రల్లో నటించారు. అన్ని కార్యక్రమాలు పూర్తి చేసుకున్న ఈ చిత్రం దసరా సెలవుల సందర్భంగా అక్టోబర్ 9న వరల్డ్‌వైడ్ గ్రాండ్ థియేట్రికల్ రిలీజ్‌కు సిద్ధమైంది.

ట్రైలర్ లాంఛ్ కార్యక్రమంలో చిత్రబృందం సినిమా గురించి ఆసక్తికర విషయాలను వెల్లడించింది. పాయల్ మాట్లాడుతూ.. క్లిష్ట పరిస్థితులను ఎదుర్కొన్నప్పుడు ఓ మహిళ ఎలా స్పందిస్తుంది అనే ఆసక్తికరమైన కథాంశంతో ఈ సినిమా తెరకెక్కిందని తెలిపారు. దర్శకుడు శ్రీ తేజ్ ఎస్.కె. మాట్లాడుతూ.. ప్రేక్షకులకు విభిన్నమైన అనుభూతిని అందించాలనే ఉద్దేశంతో సినిమాను రూపొందించామని, హాలీవుడ్, కొరియన్ సినిమాల తరహా కలర్ గ్రేడింగ్‌తో ప్రత్యేకంగా తీర్చిదిద్దామని చెప్పారు. నిర్మాత శశిధర్ నల్ల పాయల్ నటన, చిత్రబృందం కష్టాన్ని ప్రశంసించారు. నటీనటులు కూడా ట్రైలర్ ఆకట్టుకునేలా ఉందని, సినిమా ప్రేక్షకులకు సీట్ ఎడ్జ్ థ్రిల్లింగ్ అనుభూతిని అందిస్తుందని తెలిపారు. అక్టోబర్ 9న థియేటర్లలో మయూఖను చూడాలని చిత్రబృందం ప్రేక్షకులను కోరింది.