రోహిత్‌పై త్రిగుణ్ తీవ్ర అసహనం.. కుండ పగలగొట్టి మరీ ఆగ్రహం!

బిగ్‌బాస్ తెలుగు సీజన్ 10లో ఎనిమిదో వారం డబుల్ ఎలిమినేషన్ ఉత్కంఠ రేపుతోంది. ఇప్పటికే శనివారం ఎపిసోడ్‌లో ఝాన్సీ ఎలిమినేట్ కాగా, ఆదివారం మరో కంటెస్టెంట్ హౌస్‌ను వీడనున్నట్లు తాజా డే 56 ప్రోమోతో తెలుస్తోంది. రెడ్ లెవెల్‌లో ఉన్న శ్వేత, ఆర్కే, రోహిత్‌లలో ఒకరిని గ్రీన్ లెవెల్ సభ్యుల ఓట్ల ఆధారంగా సడెన్ ఎలిమినేషన్‌కు ఎంపిక చేసే ప్రక్రియను నాగార్జున వివరించారు. ప్రోమోలో కనిపించిన దాని ప్రకారం.. నరేష్ రోహిత్ బొమ్మను ఎంచుకోగా, వర్షిణి ఆర్కేకు ఓటు వేసింది. వైల్డ్ కార్డ్ కంటెస్టెంట్లకు అవకాశం ఇవ్వాలనే ఉద్దేశంతో రోహిత్‌ను ఎంపిక చేసినట్లు దేబ్జానీ చెప్పింది. ముకేష్, శివ్, సుధీర్, నీతూ కూడా తమ నిర్ణయాలకు కారణాలను వివరించారు.

ఈ టాస్క్‌లో త్రిగుణ్ స్పందన ప్రత్యేకంగా నిలిచింది. రోహిత్‌పై తీవ్ర అసహనం వ్యక్తం చేసిన అతడు.. ఈ ఇంట్లో ఉండేందుకు రోహిత్ అర్హుడు కాదంటూ అతడి బొమ్మ ఉన్న కుండను కోపంగా పగలగొట్టాడు. గ్రీన్ లెవెల్ సభ్యుల్లో ఎక్కువ మంది రోహిత్‌కు వ్యతిరేకంగా ఓట్లు వేసినట్లు ప్రోమో ఆధారంగా అర్థమవుతోంది. దీంతో రోహిత్ ఎలిమినేషన్ దాదాపు ఖాయమనే ప్రచారం జరుగుతోంది. అయితే అతడికి సీక్రెట్ రూమ్ అవకాశం ఇచ్చారా? లేక ఈ ప్రచారం వెనుక పీఆర్ వ్యూహం ఉందా? అనే విషయాలపై స్పష్టత రావాల్సి ఉంది. పూర్తి ఎపిసోడ్ ప్రసారమైతేనే అసలు విషయం వెల్లడికానుంది.