మహిళల ఆసియా కప్‌లో హాంకాంగ్‌తో భారత్‌ ఢీ..

మహిళల టీ20 ఆసియా కప్‌లో భారత జట్టు రెండో గ్రూప్‌-ఎ మ్యాచ్‌కు సిద్ధమైంది. గురువారం దుబాయ్‌ ఇంటర్నేషనల్‌ స్టేడియంలో హాంకాంగ్‌తో తలపడనుంది. హర్మన్‌ప్రీత్‌ కౌర్‌ నాయకత్వంలోని భారత్‌.. తొలి మ్యాచ్‌లో థాయ్‌లాండ్‌పై 94 పరుగుల తేడాతో ఘన విజయం సాధించింది. అయితే ఆ మ్యాచ్‌లో బ్యాటింగ్‌ పూర్తిస్థాయిలో ఆకట్టుకోలేదు. ఓ దశలో భారీ స్కోరు సాధించేలా కనిపించిన భారత్‌.. చివర్లో వరుసగా వికెట్లు కోల్పోయి 159 పరుగులకే పరిమితమైంది.

హాంకాంగ్‌తో మ్యాచ్‌లో భారత్‌కు పెద్దగా ఇబ్బందులు ఎదురయ్యే అవకాశం లేకపోయినా.. రానున్న పాకిస్థాన్‌తో కీలక పోరుకు ముందు బ్యాటింగ్‌ లోపాలను సరిదిద్దుకోవాల్సిన అవసరం ఉంది. స్మృతి మంధాన, షఫాలీ వర్మ మంచి ఆరంభాలను భారీ స్కోర్లుగా మలచాల్సి ఉండగా.. కెప్టెన్‌ హర్మన్‌ప్రీత్‌ కౌర్‌ కూడా బ్యాట్‌తో రాణించాలని జట్టు కోరుకుంటోంది. బౌలింగ్‌లో దీప్తి శర్మ, శ్రీచరణి, నందిని శర్మ, క్రాంతి గౌడ్‌లతో భారత్‌ బలంగా కనిపిస్తోంది. హాంకాంగ్‌పై విజయం సాధిస్తే సెమీఫైనల్‌ అవకాశాలను మరింత బలోపేతం చేసుకోవచ్చు.