వరల్డ్‌ చాంపియన్‌ గుకేశ్‌కు సిందరోవ్‌ సవాల్‌

ఫిడే వరల్డ్‌ చాంపియన్‌షిప్‌-2026కు స్విట్జర్లాండ్‌లోని జెనీవా వేదిక కానుంది. నవంబర్‌ 22న ప్రారంభమయ్యే ఈ ప్రపంచ టైటిల్‌ పోరులో డిఫెండింగ్‌ చాంపియన్‌ డి. గుకేశ్‌ను ఉజ్బెకిస్థాన్‌ గ్రాండ్‌మాస్టర్‌ జవోఖిర్‌ సిందరోవ్‌ సవాల్‌ చేయనున్నాడు. ఇద్దరూ 20 ఏళ్ల వయసులోనే ప్రపంచ కిరీటం కోసం తలపడనుండటంతో ఇది చెస్‌ చరిత్రలోనే అత్యంత పిన్న వయస్కుల ప్రపంచ చాంపియన్‌షిప్‌ మ్యాచ్‌గా నిలవనుంది. తొలి క్లాసికల్‌ గేమ్‌ నవంబర్‌ 24న జరగనుంది.

మ్యాచ్‌లో గరిష్ఠంగా 14 క్లాసికల్‌ గేమ్స్‌ ఉంటాయి. ముందుగా 7.5 పాయింట్లు సాధించిన ఆటగాడు ప్రపంచ చాంపియన్‌గా నిలుస్తాడు. 14 గేమ్స్‌ అనంతరం స్కోరు 7-7గా సమమైతే డిసెంబర్‌ 12న టైబ్రేక్‌ ద్వారా విజేతను నిర్ణయిస్తారు. మొత్తం ప్రైజ్‌ ఫండ్‌ 25 లక్షల అమెరికన్‌ డాలర్లు (సుమారు రూ.24 కోట్లు) కాగా, ఒక్కో క్లాసికల్‌ గేమ్‌ గెలిచినందుకు ఆటగాడికి 2 లక్షల డాలర్లు (సుమారు రూ.1.91 కోట్లు) లభిస్తాయి.