ఏఐ ఏజెంట్ల ప్రభావం.. మానవ ట్రాఫిక్‌ను దాటేసిన బాట్ ట్రాఫిక్

మాథ్యూ ప్రిన్స్ వెల్లడించిన వివరాల ప్రకారం, ఇంటర్నెట్ చరిత్రలో తొలిసారిగా బాట్ల ద్వారా సృష్టించబడుతున్న ట్రాఫిక్, మానవుల ట్రాఫిక్‌ను అధిగమించింది. ఏఐ ఆధారిత ఏజెంట్ల వినియోగం వేగంగా పెరగడంతో ఈ మార్పు ఊహించిన దానికంటే ముందుగానే చోటుచేసుకున్నట్లు ఆయన తెలిపారు. 2027లో ఈ మైలురాయి నమోదవుతుందని భావించినప్పటికీ, ఏఐ టెక్నాలజీ విస్తరణ కారణంగా ఇది ఇప్పటికే నిజమైందని పేర్కొన్నారు.

క్లౌడ్‌ఫ్లేర్ తాజా నివేదిక ప్రకారం, ప్రస్తుతం ఇంటర్నెట్ ట్రాఫిక్‌లో 57.5 శాతం బాట్ల నుంచే వస్తుండగా, మానవుల వాటా 42.5 శాతంగా ఉంది. ఉత్పత్తుల ధరల పోలిక, హోటల్ బుకింగ్‌ల పరిశీలన, కంటెంట్ సేకరణ, కస్టమర్ సపోర్ట్, వ్యక్తిగత సహాయక సేవలు వంటి అనేక పనులను ఏఐ ఏజెంట్లు నిర్వహిస్తున్నాయి. అయితే వీడియో స్ట్రీమింగ్, సోషల్ మీడియా వినియోగం, యాప్‌లలో గడిపే సమయం వంటి అంశాల్లో ఇప్పటికీ మానవులదే ఆధిపత్యం కొనసాగుతోంది.