ఏఐ ఎఫెక్ట్.. ఫ్రెషర్లకు ఎదురవుతున్న కొత్త సవాల్!

కృత్రిమ మేధ వేగంగా విస్తరిస్తుండటంతో ప్రపంచ ఉద్యోగ మార్కెట్‌లో గణనీయమైన మార్పులు చోటుచేసుకుంటున్నాయి. ముఖ్యంగా కెరీర్‌ను ప్రారంభించే యువతకు ఈ మార్పులు సవాలుగా మారుతున్నాయి. గోల్డ్‌మన్ సాక్స్ రీసెర్చ్ అధ్యయనం ప్రకారం, సులభంగా ఆటోమేట్ చేయగల పనులకు కొత్తగా ఉద్యోగులను నియమించేందుకు కంపెనీలు మరింత జాగ్రత్తగా వ్యవహరిస్తున్నాయి. ఆటోమేషన్‌కు అధికంగా ప్రభావితమయ్యే రంగాల్లో 2022 ద్వితీయార్థం నుంచి ఉద్యోగాల తగ్గుదల ప్రారంభమైనట్లు అధ్యయనం పేర్కొంది. అమెరికా, జర్మనీ, ఆస్ట్రేలియా వంటి అభివృద్ధి చెందిన దేశాల్లో ఈ ధోరణి స్పష్టంగా కనిపించినట్లు తెలిపింది.

డేటా నిర్వహణ, సాధారణ కస్టమర్ సపోర్ట్, ప్రాథమిక కంటెంట్ తయారీ వంటి పనులను ఏఐ సాధనాలు వేగంగా నిర్వహిస్తున్నాయి. కాల్ సెంటర్ రంగంలోనూ ఈ మార్పు ప్రభావం కనిపిస్తోంది. చాట్‌బాట్లు, ఏఐ ఆధారిత వాయిస్ ఏజెంట్లు సాధారణ ప్రశ్నలకు సమాధానాలు ఇవ్వడం, సమాచారాన్ని సేకరించడం, కస్టమర్లతో ప్రాథమిక సంభాషణలు నిర్వహించడం వంటి పనులను చేపడుతున్నాయి. దీంతో క్లిష్టమైన సమస్యలను పరిష్కరించేందుకు మానవ నైపుణ్యాల అవసరం మరింత పెరుగుతోంది. మారుతున్న ఉద్యోగ మార్కెట్‌లో సంప్రదాయ డిగ్రీతో పాటు సాంకేతిక నైపుణ్యాలు, ఏఐ సాధనాలపై అవగాహన పెంచుకోవడం ఉద్యోగార్థులకు ఉపయోగకరంగా ఉంటుందని నిపుణులు సూచిస్తున్నారు.