దక్షిణాఫ్రికాలో కొత్త టాటా పంచ్ విడుదల..

టాటా మోటార్స్ తన ప్రజాదరణ పొందిన పంచ్ SUV అప్‌డేటెడ్ మోడల్‌ను దక్షిణాఫ్రికా మార్కెట్లో అక్టోబర్ 29న విడుదల చేసింది. ఈ కొత్త మోడల్‌ను Pure+, Adventure, Accomplished+ S అనే మూడు వేరియంట్లలో అందుబాటులోకి తీసుకొచ్చింది. ప్రారంభ ధరను 2,24,900 ర్యాండ్లుగా నిర్ణయించింది. గత మోడల్‌తో పోలిస్తే ప్రారంభ ధర 20,000 ర్యాండ్లు తగ్గింది. ఈ మూడు వేరియంట్లలోనూ ఆరు ఎయిర్‌బ్యాగ్స్‌ను ప్రామాణికంగా అందించడం ప్రత్యేకత. అయితే ఈ ధరలు, ఫీచర్లు దక్షిణాఫ్రికాలో విడుదలైన మోడల్‌కు మాత్రమే వర్తిస్తాయి.

Pure+, Adventure వేరియంట్లలో 1.2 లీటర్ నేచురల్లీ ఆస్పిరేటెడ్ పెట్రోల్ ఇంజిన్‌ను అందించారు. ఇది 88 PS పవర్, 115 Nm టార్క్‌ను ఉత్పత్తి చేస్తుంది. టాప్ వేరియంట్ Accomplished+ Sలో 1.2 లీటర్ టర్బో పెట్రోల్ ఇంజిన్ ఉండగా, ఇది సుమారు 120 PS పవర్, 170 Nm టార్క్‌ను అందిస్తుంది. Adventure వేరియంట్‌లో 360 డిగ్రీ కెమెరా, బ్లైండ్ వ్యూ మానిటర్ వంటి ఫీచర్లు ఉన్నాయి. టాప్ వేరియంట్‌లో వాయిస్ అసిస్టెంట్‌తో పనిచేసే సన్‌రూఫ్‌ను ఇచ్చారు. వీటితో పాటు ఎలక్ట్రానిక్ స్టెబిలిటీ కంట్రోల్, హిల్ హోల్డ్ అసిస్ట్, టైర్ ప్రెజర్ మానిటరింగ్ సిస్టమ్, వైర్‌లెస్ Apple CarPlay, Android Auto సదుపాయాలు ఉన్నాయి. దక్షిణాఫ్రికా మోడళ్లకు ఐదేళ్లు లేదా 1,25,000 కిలోమీటర్ల వారంటీ, రెండేళ్లు లేదా 30,000 కిలోమీటర్ల సర్వీస్ ప్లాన్‌ను అందిస్తున్నారు.