సోదరి అంబికపై నటి రాధ సంచలన ఆరోపణలు

తన సోదరి, సీనియర్ నటి అంబిక, సోదరుడు మల్లికార్జున్‌పై నటి రాధ సంచలన ఆరోపణలు చేశారు. తన గదిలో సంతకం చేసి ఉంచిన ఖాళీ చెక్కులను అపహరించి, వాటి ద్వారా సుమారు రూ.49.70 కోట్లను కాజేసేందుకు ప్రయత్నించారని ఆరోపిస్తూ సోమవారం చెన్నై పోలీస్ కమిషనర్ కార్యాలయంలో ఫిర్యాదు చేశారు. చెన్నై వలసరవాక్కంలోని తన ఇంట్లో రాధ నివసిస్తున్నారు. వ్యాపార, వ్యక్తిగత పనుల నిమిత్తం తరచూ బయటకు వెళ్లే ఆమె సిబ్బంది జీతాలు, ఇతర అవసరాల కోసం కొన్ని ఖాళీ చెక్కులపై సంతకాలు చేసి తన గదిలో ఉంచుతుంటారని తెలిపారు.

రాధకు చెందిన ‘ఏఆర్‌ఎస్‌ గార్డెన్‌ స్టూడియో’ పేరును ఇటీవల ‘ఆర్‌ఆర్‌ గార్డెన్‌’గా మార్చడంతో పాత చెక్కులు చెల్లవని, కొత్త చెక్‌బుక్‌ను వినియోగిస్తున్నట్లు ఐడీబీఐ బ్యాంకుకు సమాచారం ఇచ్చారు. అయితే ఈ నెల 17న అంబిక పేరు మీద ఐదు పాత చెక్కులతో మొత్తం రూ.49.70 కోట్లను డ్రా చేసేందుకు ప్రయత్నించినట్లు బ్యాంకు సిబ్బంది రాధకు సమాచారం ఇచ్చారు. దీంతో ఆమె వెంటనే అప్రమత్తమై లావాదేవీలను నిలిపివేశారు. ఆరా తీసిన అనంతరం, ఇంటి కింది అంతస్తులో నివసిస్తున్న అంబికే ఆ ఖాళీ చెక్కులను తీసుకెళ్లి ఉండొచ్చని, వాటిపై పేర్లు, ఇతర వివరాలను మల్లికార్జున్ రాసి ఉండొచ్చని రాధ అనుమానం వ్యక్తం చేశారు. ఈ వ్యవహారంపై సమగ్ర విచారణ జరిపి చర్యలు తీసుకోవాలని పోలీసులను కోరారు.