కేర్ హెల్త్ ఇన్సూరెన్స్ పాలసీదారులకు షాక్.. తెలంగాణలో క్యాష్‌లెస్ చికిత్స నిలిపివేత!

కేర్ హెల్త్ ఇన్సూరెన్స్ పాలసీదారులకు తెలంగాణలో ఇబ్బందులు ఎదురయ్యే పరిస్థితి ఏర్పడింది. తెలంగాణ స్పెషాలిటీ హాస్పిటల్స్ అసోసియేషన్ (TSHA) తన పరిధిలోని సభ్య ఆస్పత్రుల్లో కేర్ హెల్త్ ఇన్సూరెన్స్‌కు సంబంధించిన క్యాష్‌లెస్ చికిత్స సేవలను నిలిపివేస్తున్నట్లు ప్రకటించింది. క్లెయిమ్‌ల పరిష్కారంలో తీవ్ర జాప్యం, సరైన కారణాలు లేకుండా క్లెయిమ్‌లను తిరస్కరించడం, క్లెయిమ్ మొత్తాల్లో అన్యాయంగా కోతలు విధించడం, ముందస్తు సమాచారం లేకుండా ఆస్పత్రులను నెట్‌వర్క్ నుంచి తొలగించడం వంటి సమస్యలను అసోసియేషన్ ప్రస్తావించింది. ఈ అంశాలపై కేర్ హెల్త్ ఉన్నతాధికారులను పలుమార్లు సంప్రదించినా సరైన స్పందన రాలేదని తెలిపింది. దీంతో ఇకపై ఆయా ఆస్పత్రుల్లో చికిత్స పొందే రోగులు ముందుగా బిల్లులు చెల్లించి, ఆ తర్వాత రీయింబర్స్‌మెంట్ కోసం దరఖాస్తు చేసుకోవాల్సి రావచ్చు. సమస్యల పరిష్కారానికి బీమా సంస్థ చర్చలకు ముందుకు వస్తే క్యాష్‌లెస్ సేవలను తిరిగి ప్రారంభించేందుకు సిద్ధంగా ఉన్నట్లు అసోసియేషన్ వెల్లడించింది.

ఈ నిర్ణయం ముఖ్యంగా ఖరీదైన వైద్య చికిత్సల కోసం క్యాష్‌లెస్ సదుపాయంపై ఆధారపడే మధ్యతరగతి కుటుంబాలపై ఆర్థిక భారాన్ని పెంచే అవకాశం ఉంది. హైదరాబాద్‌లోని కార్పొరేట్ ఆస్పత్రుల్లో చికిత్స పొందేందుకు ఆంధ్రప్రదేశ్ నుంచి వచ్చే రోగులపైనా దీని ప్రభావం పడవచ్చు. ఇదిలా ఉండగా, క్లెయిమ్‌ల నిర్వహణ, ఆస్పత్రుల డిస్కౌంట్ల వివరాలు, క్లెయిమ్ కోతలపై పాలసీదారులకు సమాచారం అందించే విషయంలో లోపాలు ఉన్నాయనే కారణాలతో 2025 డిసెంబర్‌లో ఐఆర్‌డీఏఐ కేర్ హెల్త్ ఇన్సూరెన్స్‌కు రూ.1 కోటి జరిమానా విధించినట్లు నివేదిక పేర్కొంది. క్లెయిమ్‌లలో అన్యాయమైన కోతలు లేదా తిరస్కరణలు ఎదుర్కొన్న పాలసీదారులు హైదరాబాద్‌లోని ఇన్సూరెన్స్ అంబుడ్స్‌మన్ కార్యాలయాన్ని ఆశ్రయించవచ్చు. ఆస్పత్రిలో చేరే ముందు క్యాష్‌లెస్ సదుపాయం అందుబాటులో ఉందో లేదో ఆస్పత్రి, బీమా సంస్థ వద్ద నిర్ధారించుకోవడం మంచిది.