హర్మూజ్‌లో భారత్‌కు ప్రత్యేక మినహాయింపు..

హర్మూజ్‌ జలసంధిలో భారత్‌తో పాటు తమ మిత్ర దేశాల నౌకలకు ప్రత్యేక మినహాయింపు ఇస్తున్నట్లు ఇరాన్ ప్రకటించింది. ఇతర దేశాల వాణిజ్య నౌకలపై ఉన్న ఆంక్షలు లేకుండానే భారత్‌, చైనా, ఇరాక్‌, ఖతార్‌ నౌకలు జలసంధి గుండా ప్రయాణించవచ్చని ఇరాన్ విదేశాంగ విధాన కమిటీ డిప్యూటీ ఛైర్మన్ అమీర్ హయత్ తెలిపారు. అయితే ఈ నౌకల నుంచి రవాణా రుసుము వసూలు చేస్తామని స్పష్టం చేశారు. భారత్ నుంచి పశ్చిమాసియా దేశాలకు ఔషధాల సరఫరాను సులభతరం చేయడం కూడా ఈ నిర్ణయం వెనుక ఉన్న ఉద్దేశాల్లో ఒకటని పేర్కొన్నారు.

ఇరాన్ దౌత్య, ఆర్థిక ప్రయోజనాలను దృష్టిలో ఉంచుకుని ఈ మినహాయింపులు ఇచ్చినట్లు అమీర్ హయత్ వెల్లడించారు. భారత్ నుంచి ఔషధాల దిగుమతిని సులభతరం చేయడంతో పాటు, చైనా నుంచి రాజకీయ మద్దతు పొందేందుకు ఈ చర్యలు ఉపయోగపడతాయని ఆయన పేర్కొన్నారు. ఈ దేశాల నౌకలను అమెరికా కూడా అడ్డుకోదని ఆయన అన్నారు. ప్రపంచవ్యాప్తంగా చమురు రవాణాకు అత్యంత కీలకమైన మార్గాల్లో హర్మూజ్‌ జలసంధి ఒకటి. ప్రస్తుతం ఈ జలసంధిలో నౌకాయానంపై ఆంక్షలు కొనసాగుతున్నాయి.