ఒప్పందాలు కార్యరూపం దాల్చాలి.. అధికారులకు చంద్రబాబు కీలక ఆదేశాలు

ఆంధ్రప్రదేశ్ ముఖ్యమంత్రి చంద్రబాబు అధ్యక్షతన రాష్ట్రస్థాయి పెట్టుబడుల ప్రోత్సాహక బోర్డు (ఎస్‌ఐపీబీ) సమావేశం జరిగింది. పరిశ్రమలు, ఇంధనం, పర్యాటకం, ఐటీ, ఎలక్ట్రానిక్స్‌, ఫుడ్‌ ప్రాసెసింగ్‌, మౌలిక సదుపాయాల రంగాల్లో పెట్టుబడుల ప్రతిపాదనలపై చర్చించారు. గతంలో కుదిరిన ఒప్పందాలు వాస్తవ పెట్టుబడులుగా మారడంతోపాటు ఉత్పత్తి ప్రారంభమయ్యేలా చర్యలు తీసుకోవాలని సీఎం అధికారులకు సూచించారు. ఇప్పటివరకు కుదిరిన 714 ఒప్పందాల్లో 519 ప్రాజెక్టులు కార్యాచరణ ప్రారంభించినట్లు అధికారులు ముఖ్యమంత్రికి వివరించారు.

పెట్టుబడుల సదస్సు నిర్వహణ కోసం విశాఖపట్నంలో కన్వెన్షన్‌ సెంటర్‌ ఏర్పాటు చేయాలని చంద్రబాబు ఆదేశించారు. రాయలసీమను గ్లోబల్‌ హార్టికల్చర్‌ హబ్‌గా అభివృద్ధి చేసే క్రమంలో పెట్టుబడులు, మౌలిక సదుపాయాలు, ఫుడ్‌ ప్రాసెసింగ్‌ రంగాలకు ప్రాధాన్యం ఇవ్వాలని సూచించారు. పోర్టులు, విమానాశ్రయాలు, తూర్పు-పశ్చిమ ప్రాంతాల అనుసంధానంపై దృష్టి పెట్టాలని, సెమీ కండక్టర్‌ తయారీ యూనిట్లతో అనుబంధ పరిశ్రమల వ్యవస్థను అభివృద్ధి చేయాలని పేర్కొన్నారు. ఈ సమావేశానికి మంత్రులు లోకేశ్‌, టీజీ భరత్‌, అనగాని సత్యప్రసాద్‌, గొట్టిపాటి రవికుమార్‌, నారాయణ, కందుల దుర్గేశ్‌ వర్చువల్‌గా హాజరయ్యారు.