బొల్లారం ఆర్మీ ఆయుధాల చోరీ కేసులో మరో ట్విస్ట్

సికింద్రాబాద్‌ బొల్లారంలోని మద్రాస్‌ రెజిమెంట్‌ ఆయుధాల చోరీ కేసులో సంచలన విషయాలు వెలుగులోకి వచ్చాయి. మాజీ హవిల్దార్‌ ఉప్పుతోళ్ల మల్లేశ్‌ అలియాస్‌ రాజు చోరీ చేసిన ఆర్మీ ఆయుధాలతో బ్యాంకులు, బంగారు దుకాణాల్లో దోపిడీలు చేయాలని పథకం వేసినట్లు మల్కాజిగిరి పోలీసుల దర్యాప్తులో వెల్లడైంది. గతంలోనూ నేర చరిత్ర ఉన్న మల్లేశ్‌ విలాస జీవితానికి అలవాటు పడి దోపిడీలకు పాల్పడేందుకు ప్రయత్నించినట్లు పోలీసులు తెలిపారు. ఈ కుట్రకు సంబంధించి మల్లేశ్‌తో పాటు మరో ఏడుగురిని పోలీసులు అరెస్టు చేశారు.

ఆర్మీ ఆయుధాగారంలో పరిచయమున్న ముగ్గురు ఉద్యోగుల సహకారంతో మల్లేశ్‌ ఆయుధాలను చోరీ చేసినట్లు దర్యాప్తులో తేలింది. ఆగస్టు 30న ఆయుధాగారం నుంచి 12 తుపాకులు, 1,912 తూటాలు, మూడు బైనాక్యులర్లు చోరీ కాగా.. మరుసటి రోజు అధికారులు గుర్తించి బొల్లారం పోలీసులకు ఫిర్యాదు చేశారు. సెప్టెంబర్‌ 11న మల్లేశ్‌ను అరెస్టు చేసిన పోలీసులు, కస్టడీలో విచారించగా చోరీ వెనుక ఉన్న కుట్ర వెలుగులోకి వచ్చింది. దీంతో మాజీ సైనికుడితో పాటు సహకరించిన ఏడుగురిని అరెస్టు చేసి రిమాండ్‌కు తరలించారు.