ధర్మ కార్యాలను ఎవరూ ఆపలేరు: దత్తాత్రేయ హోసబళే

ధర్మ పరిరక్షణ కోసం జీవితాన్ని అంకితం చేసిన మహనీయులను హింసతో లేదా కుట్రలతో అడ్డుకోవాలని ధర్మ విరోధులు ప్రయత్నించినా, ధర్మ కార్యాలను ఎవరూ ఆపలేరని ఆర్‌ఎస్‌ఎస్ సర్కార్యవాహ్ దత్తాత్రేయ హోసబళే అన్నారు. భువనేశ్వర్‌లోని రైల్వే ఆడిటోరియంలో స్వామి లక్ష్మణానంద సరస్వతిపై రచించిన పుస్తకావిష్కరణ కార్యక్రమంలో మాట్లాడుతూ, స్వామీజీ త్యాగం దేశానికి, సమాజానికి చిరస్థాయి స్ఫూర్తిగా నిలిచిందని పేర్కొన్నారు. ఆయనలాంటి మహనీయుల ఆలోచనలు మరెందరినో సేవా మార్గంలో నడిపిస్తున్నాయని అన్నారు.

గురు తేగ్ బహదూర్, స్వామి శ్రద్ధానంద, స్వామి లక్ష్మణానంద సరస్వతి వంటి మహనీయులు ధర్మం, సమాజ రక్షణ కోసం చేసిన త్యాగాలను హోసబళే గుర్తు చేశారు. దేశ సేవలో ఉన్నవారిపై అనేక ప్రాంతాల్లో దాడులు జరిగినప్పటికీ, సేవా భావం మరింత బలపడుతుందని ఆయన అభిప్రాయపడ్డారు. ఈ కార్యక్రమంలో ఒడిశా ముఖ్యమంత్రి మోహన్ చరణ్ మాఝీ, ఎంపీ ధర్మేంద్ర ప్రధాన్, స్వామి జీవన్ ముక్తానంద పురి, పలువురు సాధువులు, సామాజిక కార్యకర్తలు మరియు ప్రముఖులు పాల్గొన్నారు.