ఒరాకిల్‌లో మరోసారి లేఆఫ్స్?

టెక్ దిగ్గజం ఒరాకిల్‌లో మరో విడత ఉద్యోగాల కోతలు జరిగే అవకాశం ఉన్నట్లు నివేదికలు వెలువడ్డాయి. AI మౌలిక వసతులపై భారీగా పెట్టుబడులు పెడుతున్న నేపథ్యంలో పేరోల్ వ్యయాలను తగ్గించేందుకు ఈ నెలలో మరోసారి ఉద్యోగులను తగ్గించాలని కంపెనీ యోచిస్తున్నట్లు బిజినెస్ ఇన్‌సైడర్ ఆగస్టు 11న వెల్లడించింది. ఈ వివరాలను కంపెనీ ప్రణాళికలపై అవగాహన ఉన్న వ్యక్తులు, అంతర్గత పత్రాన్ని ఆధారంగా చేసుకుని నివేదించింది. కొన్ని విభాగాల్లో ఉద్యోగుల సంఖ్య రెండంకెల శాతంలో తగ్గే అవకాశం ఉన్నట్లు సమాచారం. 2026లో ఇప్పటికే ఒరాకిల్ సుమారు 21,000 ఉద్యోగాలను తొలగించింది.

అయితే ఈ ఉద్యోగాల కోతలు కంపెనీ వ్యాపారం బలహీనపడటం వల్ల జరుగుతున్నాయనే పరిస్థితి కనిపించడం లేదు. ఒరాకిల్ 2026 ఆర్థిక సంవత్సరంలో రికార్డు స్థాయిలో 67.4 బిలియన్ డాలర్ల ఆదాయాన్ని నమోదు చేసింది. అలాగే భవిష్యత్ పనితీరు ఒప్పందాల విలువ 638 బిలియన్ డాలర్లకు చేరింది. AI, క్లౌడ్ మౌలిక వసతుల విస్తరణ కోసం 2026 ఆర్థిక సంవత్సరంలో సుమారు 50 బిలియన్ డాలర్ల మూలధన వ్యయం చేయాలని కంపెనీ లక్ష్యంగా పెట్టుకుంది. ఈ భారీ పెట్టుబడులకు అవసరమైన నిధుల సమీకరణతో పాటు వ్యయ నియంత్రణలో భాగంగానే ఉద్యోగుల పునర్వ్యవస్థీకరణను కంపెనీ చేపడుతున్నట్లు తెలుస్తోంది.