అమెరికా PERM నిర్ణయంపై టీసీఎస్ కీలక ప్రకటన...

అమెరికా ప్రభుత్వం పర్మనెంట్ లేబర్ సర్టిఫికేషన్ (PERM) ప్రోగ్రామ్‌కు సంబంధించి తీసుకున్న నిర్ణయంపై టాటా కన్సల్టెన్సీ సర్వీసెస్ (TCS) స్పందించింది. ఈ నిర్ణయం తమ ఉద్యోగ నియామక వ్యూహం లేదా క్లయింట్లకు అందించే సేవలపై గణనీయమైన ప్రభావం చూపబోదని కంపెనీ వెల్లడించింది. అమెరికా కార్మికశాఖ జారీ చేసే ఆదేశాలను పూర్తిగా పాటిస్తామని స్పష్టం చేసింది. గత రెండేళ్లలో తమ PERM దరఖాస్తుల సంఖ్య సింగిల్ డిజిట్‌లోనే ఉందని పేర్కొంది. అర్హులైన విదేశీ ఉద్యోగులకు యజమానుల ద్వారా గ్రీన్ కార్డ్ పొందే ప్రక్రియలో PERM కీలకమైన దశగా ఉంటుంది. ఈ ప్రోగ్రామ్‌పై ఆంక్షలు విధించడంతో ప్రభావం పరిమితంగానే ఉంటుందని టీసీఎస్ అంచనా వేస్తోంది.

అమెరికాలో తమ నియామక వ్యూహం ప్రధానంగా స్థానిక ప్రతిభను నియమించుకోవడంపైనే ఆధారపడి ఉందని టీసీఎస్ తెలిపింది. ఇందుకోసం బలమైన క్యాంపస్ రిక్రూట్‌మెంట్ విధానాన్ని అనుసరిస్తున్నట్లు పేర్కొంది. అమెరికా వ్యాప్తంగా ఉన్న 31 కార్యాలయాలు, డెలివరీ కేంద్రాల ద్వారా గణనీయమైన స్థానిక ఉద్యోగుల బృందాన్ని నిర్మించుకున్నట్లు వెల్లడించింది. వచ్చే ఐదేళ్లలో అమెరికాలో అదనంగా 15,000 మందిని నియమించుకోవాలనే ప్రణాళికను కూడా పునరుద్ఘాటించింది. స్థానిక నియామకాలకు ప్రాధాన్యమిస్తూ, అమెరికా కార్మిక నిబంధనలకు అనుగుణంగా కార్యకలాపాలను కొనసాగిస్తామని కంపెనీ స్పష్టం చేసింది.