బీఆర్‌ఎస్ ఎమ్మెల్యేలను అడ్డుకున్న ఘటనపై హైకోర్టు ఆగ్రహం..

బీఆర్‌ఎస్ ఎమ్మెల్యేలను అసెంబ్లీకి వెళ్లకుండా పోలీసులు అడ్డుకున్నారనే ఆరోపణలపై తెలంగాణ హైకోర్టు విచారణ చేపట్టింది. ఈ వ్యవహారంపై బీఆర్‌ఎస్ దాఖలు చేసిన పిటిషన్‌ను పరిశీలించిన కోర్టు, ఘటనకు సంబంధించిన పూర్తి వివరాలతో నివేదిక సమర్పించాలని డీజీపీని ఆదేశించింది. అసెంబ్లీకి వెళ్తున్న ఎమ్మెల్యేలను పోలీసులు ఎలా అడ్డుకుంటారని ప్రశ్నించింది. అసెంబ్లీ వ్యవహారాలు స్పీకర్ పరిధిలో ఉంటాయని, అక్కడ పోలీసుల పాత్ర ఏమిటని కోర్టు ప్రశ్నించినట్లు సమాచారం.

మహిళా ఎమ్మెల్యేలపై దాడి చేసినట్లు ఆరోపణలు ఎదుర్కొంటున్న వారిని గుర్తించాలని కూడా హైకోర్టు అధికారులను ఆదేశించింది. ఘటనకు సంబంధించిన నివేదికను రెండు వారాల్లోగా సమర్పించాలని డీజీపీకి స్పష్టం చేసింది. ప్రతిపక్ష ఎమ్మెల్యేలపై పోలీసుల చర్యల ఆరోపణల నేపథ్యంలో బీఆర్‌ఎస్, తెలంగాణ ప్రభుత్వం మధ్య రాజకీయ వివాదం కొనసాగుతున్న సమయంలో ఈ పరిణామం చోటుచేసుకుంది.