రామేశ్వరంలో కాఫీ తాగిన ఆలయ ఏనుగు..

రామేశ్వరంలోని రామనాథస్వామి ఆలయ ఏనుగు రామలక్ష్మి ఫిల్టర్‌ కాఫీ ఆస్వాదిస్తూ తాగుతున్న వీడియో సామాజిక మాధ్యమాల్లో వైరల్‌గా మారింది. ఆలయంలో ఆషాఢ మాస ఉత్సవాలు ఘనంగా జరుగుతున్న నేపథ్యంలో గురువారం రాత్రి పార్వతవర్ధిని అమ్మవారి ఊరేగింపు నిర్వహించారు. ఈ సందర్భంగా అమ్మవారి ముందు ఆలయ ఏనుగు రామలక్ష్మి నడిచింది.

దక్షిణ మాడ వీధిలో ఊరేగింపు సాగుతున్న సమయంలో ఓ భక్తుడు రామలక్ష్మికి ఫిల్టర్‌ కాఫీ అందించాడు. మావటి రాము ఆ కాఫీని ఏనుగుకు తాగించాడు. రామలక్ష్మి కాఫీని ఆస్వాదిస్తూ తాగుతున్న దృశ్యాలను అక్కడున్న భక్తులు తమ సెల్‌ఫోన్లలో చిత్రీకరించారు. ప్రస్తుతం ఈ వీడియో సామాజిక మాధ్యమాల్లో వైరల్‌గా మారి నెటిజన్లను ఆకట్టుకుంటోంది.