ఈసారి ఖైరతాబాద్ గణపతి ప్రత్యేకత ఇదే

వినాయక చవితి సందర్భంగా హైదరాబాద్‌లోని ఖైరతాబాద్‌లో 69 అడుగుల పంచముఖ సంకటహర మహాగణపతి విగ్రహం రూపుదిద్దుకుంటోంది. పర్యావరణ పరిరక్షణకు ప్రాధాన్యం ఇస్తూ రాజస్థాన్ నుంచి తీసుకొచ్చిన 30 టన్నుల సహజ నది మట్టితో పాటు హైదరాబాద్‌లో లభించే సుమారు 20 టన్నుల ఇసుకను ఉపయోగిస్తున్నారు. తెలంగాణ, ఆంధ్రప్రదేశ్, ఒడిశా, తమిళనాడు రాష్ట్రాలకు చెందిన 150 మందికిపైగా కళాకారులు ఈ భారీ విగ్రహ నిర్మాణంలో పాల్గొంటున్నారు.

ఒడిశాకు చెందిన మట్టి విగ్రహ కళాకారుడు జోగా రావు ఆధ్వర్యంలో విగ్రహాన్ని రూపొందిస్తున్నారు. ఈసారి మహాగణపతికి ఐదు ముఖాలు, ఆరు చేతులు ఉండగా, ఐదు తలల సర్పం ఆశీర్వదిస్తున్నట్లుగా ప్రత్యేకంగా తీర్చిదిద్దుతున్నారు. విగ్రహానికి బలమైన అంతర్గత నిర్మాణం కోసం 25 టన్నులకుపైగా ఉక్కు, స్టీల్ మెష్‌ను వినియోగిస్తున్నారు. యాదాద్రి జిల్లా నుంచి సేకరించిన 70కుపైగా ఎండిన వరి గడ్డి కట్టలను కూడా స్టీల్ మెష్‌పై పొరలుగా అమర్చి విగ్రహానికి మరింత దృఢత్వాన్ని కల్పిస్తున్నారు.

విగ్రహానికి తుది మెరుగులు దిద్దేందుకు 25 మందికిపైగా చిత్రకారులు మూడు రోజుల పాటు పనిచేశారు. రసాయన రంగులకు బదులుగా నీటి ఆధారిత, సేంద్రియ రంగులను ఉపయోగిస్తున్నారు. నిమజ్జనం సమయంలో సులభంగా నీటిలో కలిసిపోయేలా సహజ పదార్థాలతోనే విగ్రహాన్ని రూపొందిస్తున్నారు. నిర్మాణ పనులు తుది దశకు చేరుకోగా, ఈ నెల 12 నాటికి భక్తుల దర్శనానికి మహాగణపతి సిద్ధమవుతారని నిర్వాహకులు తెలిపారు. పర్యావరణహిత నిర్మాణంతో ఈసారి ఖైరతాబాద్ గణనాథుడు ప్రత్యేక ఆకర్షణగా నిలవనున్నాడు.