అమెరికా ఎన్నికల్లో భారతీయ ఓటర్లే కీలకం.. దోశలు వేస్తూ ప్రచారం చేస్తున్న అభ్యర్థులు

అమెరికాలో మధ్యంతర ఎన్నికల సందడి మొదలైంది. హోరాహోరీగా సాగనున్న ఈ ఎన్నికల్లో భారతీయ అమెరికన్ల ఓట్లు కీలకంగా మారడంతో అభ్యర్థులు వారిని ఆకట్టుకునేందుకు ప్రత్యేక ప్రయత్నాలు చేస్తున్నారు. ఆలయాలను సందర్శించడం, దీపావళి వేడుకల్లో పాల్గొనడంతో పాటు భారతీయ వంటకాలను తయారు చేస్తూ ప్రచారం నిర్వహిస్తున్నారు. నవంబర్ 3న జరగనున్న ఈ ఎన్నికలకు ఇప్పటికే పలు ప్రాంతాల్లో ముందస్తు ఓటింగ్ కొనసాగుతోంది. ఈ నేపథ్యంలో డెమోక్రటిక్ పార్టీ అభ్యర్థి జేమ్స్ తలారికో.. డల్లాస్ శివారు ప్రాంతమైన ఇర్వింగ్‌లోని ఓ భారతీయ రెస్టారెంట్‌లో దోశలు వేశారు. బంగాళాదుంప కూరతో తయారు చేసిన మసాలా దోశలను అరటి ఆకులు పరిచిన పళ్లెంలో వడ్డించడంతో అక్కడున్నవారు చప్పట్లతో అభినందించారు. ఇర్వింగ్‌లో భారతీయ అమెరికన్ల జనాభా గణనీయంగా ఉండటంతో అభ్యర్థులు ఈ ప్రాంతంపై ప్రత్యేక దృష్టి సారిస్తున్నారు.

మరోవైపు అమెరికా సెనేటర్ కోరీ బుకర్ దీపావళి వేడుకల్లో పాల్గొన్నారు. మరోసారి గవర్నర్ పదవికి పోటీ చేస్తున్న కనెక్టికట్ గవర్నర్ నెడ్ లామోంట్ కూడా ఈ వేడుకలకు హాజరయ్యారు. మరికొందరు రాజకీయ నాయకులు బీఏపీఎస్ స్వామినారాయణ్, అక్షర్‌ధామ్ వంటి ఆలయాలను సందర్శిస్తున్నారు. ఎన్నికల్లో ప్రతి ఓటు కీలకం కావడంతో భారతీయ అమెరికన్ల మద్దతు పొందేందుకు అభ్యర్థులు ప్రయత్నిస్తున్నారు. ఇదిలా ఉండగా, ఈ మధ్యంతర ఎన్నికల్లో అధికార రిపబ్లికన్ పార్టీకి ప్రతికూల పరిస్థితులు ఎదురయ్యే అవకాశం ఉందని పలు సర్వేలు సూచిస్తున్నాయి. ద్రవ్యోల్బణం, ఆర్థిక వ్యవస్థపై ప్రజల్లో ఉన్న ఆందోళనలు ఎన్నికలపై ప్రభావం చూపనున్నాయి. అయితే ప్రజల ఆర్థిక పరిస్థితిని మెరుగుపరిచేందుకు ఏ పార్టీ దగ్గరా స్పష్టమైన ప్రణాళిక లేదని పలువురు ఓటర్లు భావిస్తున్నట్లు సర్వేలు వెల్లడించాయి. ప్రస్తుతానికి ఎన్నికల్లో భారీ స్థాయి ప్రభంజనం కనిపించడం లేదని అంచనాలు వెలువడుతున్నాయి.