బాధిత కుటుంబానికి అండగా ఉంటాం.. రాయపాటి శైలజ భరోసా

అనంతపురం జిల్లా రాప్తాడులో పదో తరగతి విద్యార్థినిపై రంపంతో దాడి జరిగిన ఘటన తనను తీవ్రంగా కలచివేసిందని ఆంధ్రప్రదేశ్‌ మహిళా కమిషన్‌ ఛైర్‌పర్సన్‌ డా. రాయపాటి శైలజ తెలిపారు. ఘటన వెలుగులోకి వచ్చిన వెంటనే మహిళా కమిషన్‌ బృందం స్పందించిందని పేర్కొన్నారు. గాయపడిన విద్యార్థిని ఆరోగ్య పరిస్థితిని ఎప్పటికప్పుడు తెలుసుకుంటూ, ఆమెకు అందుతున్న వైద్య సేవలపై ఆరా తీసినట్లు వెల్లడించారు. మెరుగైన చికిత్స కోసం విద్యార్థినిని బెంగళూరులోని ఆస్పత్రికి తరలించిన నేపథ్యంలో, ఆమె తల్లితో ఫోన్‌లో మాట్లాడి ధైర్యం చెప్పినట్లు తెలిపారు.

బాధిత కుటుంబానికి మహిళా కమిషన్‌ అండగా ఉంటుందని రాయపాటి శైలజ భరోసా ఇచ్చారు. ఏదైనా సహాయం అవసరమైనా, ఇబ్బందులు ఎదురైనా తనను సంప్రదించాలని సూచించినట్లు పేర్కొన్నారు. విద్యార్థిని త్వరగా కోలుకోవాలని ఆకాంక్షించారు. మహిళలు, విద్యార్థినులు వేధింపులకు గురైతే మౌనంగా ఉండకుండా వెంటనే తల్లిదండ్రులు, ఉపాధ్యాయులు లేదా పోలీసులను సంప్రదించాలని సూచించారు. మహిళలు, బాలికల భద్రతకు ప్రాధాన్యత ఇవ్వాలని, ఇలాంటి ఘటనలు పునరావృతం కాకుండా ప్రతి ఒక్కరూ బాధ్యతగా వ్యవహరించాలని పిలుపునిచ్చారు.