షారుక్‌ ఖాన్‌ ఆస్తుల కథలో కొత్త ట్విస్ట్

బాలీవుడ్‌ అగ్ర కథానాయకుడు షారుక్‌ ఖాన్‌ నికర సంపద గతేడాదితో పోలిస్తే గణనీయంగా తగ్గినట్లు హురున్‌ ఇండియా రిచ్‌ లిస్ట్‌ 2026 నివేదిక వెల్లడించింది. గతేడాది రూ.12,490 కోట్లుగా ఉన్న ఆయన సంపద ఈ ఏడాది రూ.10,000 కోట్లకు చేరినట్లు అంచనా వేసింది. రెడ్‌ చిల్లీస్‌ ఎంటర్‌టైన్‌మెంట్‌తో పాటు కోల్‌కతా నైట్‌ రైడర్స్‌కు సంబంధించిన వ్యాపార ప్రయోజనాలు, వాటాలను కూడా ఈ లెక్కల్లో పరిగణనలోకి తీసుకున్నట్లు సమాచారం. సంపద తగ్గినప్పటికీ భారతదేశంలో అత్యంత సంపన్న నటుడిగా షారుక్‌ అగ్రస్థానంలో కొనసాగుతున్నారు.

ఈ జాబితాలో అమితాబ్‌ బచ్చన్‌ రూ.4,000 కోట్ల సంపదతో తర్వాతి స్థానంలో ఉండగా, సల్మాన్‌ ఖాన్‌ రూ.3,000 కోట్లు, హృతిక్‌ రోషన్‌ రూ.2,500 కోట్ల సంపదతో ఉన్నారు. మరోవైపు షారుక్‌ ప్రస్తుతం సిద్ధార్థ్‌ ఆనంద్‌ దర్శకత్వంలో తెరకెక్కుతున్న ‘కింగ్‌’ చిత్రంతో బిజీగా ఉన్నారు. ఈ సినిమా డిసెంబరు 24న ప్రేక్షకుల ముందుకు రానుంది. ఇందులో షారుక్‌తో పాటు ఆయన కుమార్తె సుహానా ఖాన్‌ కూడా నటిస్తున్నారు. ఈ చిత్ర బడ్జెట్‌ రూ.450 కోట్లు అంటూ వచ్చిన వార్తలను దర్శకుడు సిద్ధార్థ్‌ ఆనంద్‌ ఖండించారు.