రావాల్సిన డబ్బుల కోసం రెండేళ్లుగా ఎదురుచూస్తున్నా: చాందిని

షార్ట్ ఫిల్మ్స్ ద్వారా గుర్తింపు తెచ్చుకుని, ‘కలర్ ఫొటో’ సినిమాతో దేశవ్యాప్తంగా పేరు సంపాదించిన నటి చాందిని చౌదరి తాజాగా చేసిన సోషల్ మీడియా పోస్ట్ చర్చనీయాంశంగా మారింది. కళాకారులు, మోడల్స్ తాము పూర్తి చేసిన పనికి సంబంధించిన పారితోషికం కోసం నెలలు, సంవత్సరాలు ఎదురుచూడాల్సి రావడం బాధాకరమని ఆమె పేర్కొన్నారు. ప్రస్తుతం తాను కూడా అలాంటి పరిస్థితినే ఎదుర్కొంటున్నానని వెల్లడించారు.

ఒక సినిమా కోసం దాదాపు ఐదేళ్ల పాటు కష్టపడ్డానని, అయితే ఆ ప్రాజెక్ట్‌కు సంబంధించిన రెమ్యునరేషన్ ఇప్పటికీ అందలేదని చాందిని తెలిపారు. గత రెండేళ్లుగా తనకు రావాల్సిన డబ్బుల కోసం ప్రయత్నిస్తున్నప్పటికీ ఫలితం లేకపోయిందని ఆవేదన వ్యక్తం చేశారు. ఆమె వ్యాఖ్యల అనంతరం సోషల్ మీడియాలో ఆ సినిమా ఏదన్నదానిపై ఊహాగానాలు మొదలయ్యాయి. కొందరు ‘గామి’ సినిమాను ప్రస్తావిస్తున్నప్పటికీ, ఈ విషయంపై చాందిని ఎలాంటి అధికారిక స్పష్టత ఇవ్వలేదు.