ప్రభాస్ ‘ఫౌజీ’ రిలీజ్‌పై భారీ క్లారిటీ

రెబల్ స్టార్ ప్రభాస్ హీరోగా హను రాఘవపూడి దర్శకత్వంలో తెరకెక్కుతున్న ప్రతిష్టాత్మక చిత్రం ‘ఫౌజీ’ని మైత్రి మూవీ మేకర్స్ నిర్మిస్తోంది. కొంతకాలం క్రితం ఈ సినిమాను డిసెంబర్ 3న ప్రపంచవ్యాప్తంగా విడుదల చేస్తామని ప్రకటించినప్పటికీ, ఆ తర్వాత పెద్దగా అప్డేట్లు రాకపోవడంతో సినిమా వాయిదా పడుతుందేమోననే ప్రచారం జరిగింది. తాజాగా ‘KJQ’ ప్రీ-రిలీజ్ ఈవెంట్‌లో నిర్మాత రవిశంకర్ దీనిపై స్పందించారు.

ముందుగా ప్రకటించిన తేదీ ప్రకారమే డిసెంబర్ 3న ‘ఫౌజీ’ ప్రపంచవ్యాప్తంగా విడుదల అవుతుందని, డిసెంబర్ 2న ప్రత్యేక ప్రీమియర్ షోలు కూడా నిర్వహిస్తామని ఆయన స్పష్టం చేశారు. దీంతో విడుదలపై ఉన్న సందేహాలన్నీ తొలగిపోయాయి. ఇమాన్వి హీరోయిన్‌గా నటిస్తున్న ఈ చిత్రానికి విశాల్ చంద్రశేఖర్ సంగీతం అందిస్తుండగా, భారీ విజయంపై ప్రభాస్ అభిమానులు ఇప్పటికే భారీ అంచనాలు పెట్టుకున్నారు.