న్యూటన్స్ థర్డ్ లా నుంచి బంపర్ ఆఫర్!

సుమంత్, జగపతి బాబు ప్రధాన పాత్రల్లో రూపొందిన క్రైమ్ థ్రిల్లర్ న్యూటన్స్ థర్డ్ లా విడుదలకు ముందే ప్రేక్షకుల్లో ఆసక్తిని పెంచుతోంది. ప్రముఖ ఓటీటీ వేదిక ఈటీవీ విన్ నిర్మిస్తున్న ఈ చిత్రం జూలై 31న ప్రేక్షకుల ముందుకు రానుంది. ఇప్పటికే ట్రైలర్, ప్రచార కార్యక్రమాలతో మంచి స్పందన దక్కించుకున్న చిత్రబృందం ఇప్పుడు ప్రేక్షకులను థియేటర్లకు ఆకర్షించేందుకు ప్రత్యేక ఆఫర్ ప్రకటించింది. తెలంగాణలోని సంధ్య థియేటర్, పీవీఆర్, ఐనాక్స్ వంటి ప్రముఖ మల్టీప్లెక్స్‌లలో ఈ చిత్రాన్ని కేవలం రూ.105కే వీక్షించే అవకాశం కల్పిస్తున్నట్లు వెల్లడించింది. ఈ నిర్ణయం సినీ అభిమానుల్లో మరింత ఆసక్తిని పెంచుతోంది.

రాజేష్ కర్ణ దర్శకత్వం వహిస్తున్న ఈ చిత్రానికి సింజిత్ యెర్రమిల్లి సంగీతం అందిస్తున్నారు. సస్పెన్స్, దర్యాప్తు, భావోద్వేగ అంశాల సమ్మేళనంగా రూపొందిన ఈ చిత్రం ప్రేక్షకులను తప్పకుండా ఆకట్టుకుంటుందనే నమ్మకాన్ని చిత్రబృందం వ్యక్తం చేస్తోంది. అడ్వాన్స్ బుకింగ్స్ త్వరలో ప్రారంభం కానున్నాయని, అందుబాటు ధరలో థియేటర్ అనుభవాన్ని ఆస్వాదించే అవకాశాన్ని ప్రేక్షకులు వినియోగించుకోవాలని మేకర్స్ కోరుతున్నారు. కంటెంట్‌పై పూర్తి విశ్వాసంతో ఉన్న చిత్రబృందం, విడుదల తర్వాత మంచి స్పందన వస్తుందనే ఆశాభావంతో ప్రచార కార్యక్రమాలను వేగవంతం చేసింది. తగ్గించిన టికెట్ ధరతో కుటుంబ ప్రేక్షకులను కూడా థియేటర్లకు రప్పించాలన్నదే తమ ప్రధాన లక్ష్యమని చెబుతోంది.