తమన్ హింట్‌తో ఫ్యాన్స్‌లో హైప్!

ఆంధ్రప్రదేశ్ డిప్యూటీ సీఎం పవన్ కల్యాణ్ ప్రస్తుతం రాజకీయాలతో బిజీగా ఉండటంతో పాటు ‘ఓజీ 2’ కోసం కూడా సమయం కేటాయించేందుకు ప్రయత్నిస్తున్నారు. ఇదే సమయంలో ఆయన మరో భుజానికి శస్త్రచికిత్స చేయించుకోనున్నట్లు సమాచారం. పూర్తిగా కోలుకోవడానికి 6 నుంచి 7 నెలలు పట్టే అవకాశముండటంతో ఈ సమయంలో సినిమాలకు దూరంగా ఉండే పరిస్థితి కనిపిస్తోంది. దీంతో అభిమానులు ఎంతో ఎదురుచూస్తున్న ‘ఓజీ 2’ సినిమా మరింత ఆలస్యమయ్యే సూచనలు కనిపిస్తున్నాయి.

ఇలాంటి పరిస్థితుల్లో ‘కొరియన్ కనకరాజు’ ప్రీ రిలీజ్ ఈవెంట్‌లో పాల్గొన్న సంగీత దర్శకుడు తమన్ ‘ఓజీ 2’పై ఆసక్తికర వ్యాఖ్యలు చేశారు. అభిమానుల ప్రశ్నకు స్పందిస్తూ “సెప్టెంబర్ వరకు వేచి ఉండండి” అని చెప్పడంతో ఫ్యాన్స్‌లో కొత్త ఆశలు చిగురించాయి. పవన్ కల్యాణ్ పుట్టినరోజు సందర్భంగా స్పెషల్ అప్డేట్ వచ్చే అవకాశముందని భావిస్తున్నారు. సుజీత్ దర్శకత్వంలో తెరకెక్కుతున్న ఈ చిత్రం ‘ఓజీ’ ప్రపంచాన్ని మరింత విస్తరించనుంది.