తల్లి–కొడుకు బంధమే ‘ది ప్యారడైజ్‌’కు హార్ట్‌.. కీలక విషయాలు

నాని, ‘దసరా’ ఫేమ్‌ శ్రీకాంత్‌ ఓదెల కాంబినేషన్‌లో తెరకెక్కిన ‘ది ప్యారడైజ్‌’పై అంచనాలు రోజురోజుకూ పెరుగుతున్నాయి. ఇప్పటికే విడుదలైన గ్లింప్స్‌, టీజర్‌, పాటలు ప్రేక్షకుల్లో ఆసక్తిని పెంచగా.. సినిమా కథకు సంబంధించిన పూర్తి వివరాలను మాత్రం మేకర్స్‌ గోప్యంగా ఉంచుతున్నారు. సెప్టెంబర్‌ 24న ఈ చిత్రం థియేటర్లలోకి రానుంది. ఇటీవల ప్రమోషన్స్‌లో యాంకర్‌ ప్రదీప్‌ అడిగిన ప్రశ్నకు నాని స్పందిస్తూ, సినిమాకు మరో టైటిల్‌ పెట్టాలంటే ‘సమ్మక్క’ అని పెట్టొచ్చని, ఇది ఆమె సినిమా అంటూ వ్యాఖ్యానించడం ఆసక్తిని పెంచింది.

ఇప్పటివరకు దర్శకుడు శ్రీకాంత్‌ ఓదెల, నాని వెల్లడించిన వివరాల ప్రకారం.. ‘ది ప్యారడైజ్‌’లో తల్లి–కొడుకు అనుబంధం కథకు కీలకమైన భావోద్వేగ అంశంగా ఉండనుంది. తల్లి కోసం, తన భూమి కోసం పోరాడే వ్యక్తిగా నాని కనిపించనున్నట్లు దర్శకుడు వెల్లడించారు. మరోవైపు, ఈ సినిమాకు ట్రైలర్‌ను విడుదల చేయడం లేదని నాని ఇప్పటికే స్పష్టం చేశారు. సినిమా నిర్మాణ పనులకు ఎక్కువ సమయం కేటాయించాల్సి రావడంతో ట్రైలర్‌ సిద్ధం చేయడానికి సమయం సరిపోలేదని ఆయన తెలిపారు.