దర్శకుడు సుధీర్ అత్తవర్‌కు నిర్మాత భారీ బహుమతి

కొరగజ్జ చిత్ర దర్శకుడు సుధీర్ అత్తవర్కు నిర్మాత త్రివిక్రమ సాపల్య అరుదైన బహుమతిని అందించారు. గత మూడు సంవత్సరాలుగా ఈ చిత్రం కోసం ఆయన చేసిన కృషిని గుర్తిస్తూ సుమారు రూ.1.75 కోట్ల మార్కెట్ విలువ గల విలాసవంతమైన త్రిబుల్ బెడ్రూం ఫ్లాట్‌ను బహుమతిగా ఇచ్చారు. జనవరిలో విడుదల కావాల్సిన ఈ చిత్రాన్ని చివరి నిమిషంలో త్రీడీ ఫార్మాట్‌లోకి మార్చాలని నిర్ణయించడంతో విడుదలను వాయిదా వేశారు. ప్రస్తుతం కొచ్చి, చెన్నైలో త్రీడీ పనులు వేగంగా జరుగుతున్నాయి.

ఈ చిత్రం ఇప్పటికే ఆరు భాషల్లో రూపొందుతుండగా, ఇప్పుడు అస్సామీ, చైనీస్, ఆంగ్ల భాషల్లో కూడా విడుదలకు సిద్ధమవుతోంది. హాంకాంగ్, బీజింగ్ సహా పలు అంతర్జాతీయ మార్కెట్ల నుంచి పంపిణీదారులు ఆసక్తి చూపుతున్నట్లు నిర్మాత తెలిపారు. రూ.40 కోట్లకు పైగా బడ్జెట్‌తో రూపొందుతున్న ఈ చిత్రాన్ని ఆగస్టులో విడుదల చేయాలని సన్నాహాలు చేస్తున్నారు. దర్శకుడి నూతన గృహ ప్రవేశ వేడుక సందర్భంగా బెంగళూరులో ‘అగేలు సేవ’ కార్యక్రమం నిర్వహించగా, నటి భవ్య పాల్గొని తన ఆనందాన్ని వ్యక్తం చేశారు.