‘ధర్మన్’పై సిమ్రాన్ భారీ నమ్మకం

సీనియర్ నటి సిమ్రాన్ తన సెకండ్ ఇన్నింగ్స్‌లో వరుస అవకాశాలతో దూసుకుపోతున్నారు. గత ఏడాది టూరిస్ట్ ఫ్యామిలీ సినిమాతో విజయం సాధించిన ఆమె, ఇప్పుడు సూపర్‌స్టార్ రజినీకాంత్ సరసన ధర్మన్ చిత్రంలో కీలక పాత్రలో నటిస్తున్నారు. అశ్వత్ మారిముత్తు దర్శకత్వంలో తెరకెక్కుతున్న ఈ చిత్రంలో రాశీ ఖన్నా హీరోయిన్‌గా నటిస్తుండగా, యోగి బాబు ముఖ్య పాత్రలో కనిపించనున్నారు. కమల్ హాసన్ నిర్మాణంలో రాజ్ కమల్ ఫిలిమ్స్ ఇంటర్నేషనల్ మరియు టర్మరిక్ మీడియా బ్యానర్లపై ఈ సినిమా రూపొందుతోంది. ఇప్పటికే షూటింగ్ ప్రారంభమై, రజినీకాంత్ ఫస్ట్ లుక్‌కు మంచి స్పందన లభించింది.

ఇటీవల జరిగిన ఒక కార్యక్రమంలో సిమ్రాన్ మాట్లాడుతూ, ఈ సినిమా కోసం మొత్తం బృందం ఎంతో కష్టపడుతోందని, వచ్చే నెల నుంచి తాను కూడా షూటింగ్‌లో పాల్గొననున్నట్లు తెలిపారు. ఈ చిత్రం ఖచ్చితంగా సూపర్ హిట్ అవుతుందని ఆమె నమ్మకం వ్యక్తం చేశారు. రజినీకాంత్‌తో మళ్లీ కలిసి పనిచేయడం తనకు ఎంతో ఆనందంగా ఉందని, ఆయన నిరాడంబరతను ప్రశంసించారు. కమల్ హాసన్ నిర్మాణంలో పని చేయడం ఈ ప్రాజెక్ట్‌ను మరింత ప్రత్యేకంగా మార్చిందన్నారు. గతంలో పేట సినిమా తనకు ఒక చిన్న అనుభవం మాత్రమేనని, ఇప్పుడు ఆయనతో మరింతగా పని చేసే అవకాశం రావడం సంతోషంగా ఉందని చెప్పారు. ఈ చిత్రం సినీ చరిత్రలో నిలిచిపోతుందని, అందులో భాగం కావడం గర్వంగా భావిస్తున్నట్లు తెలిపారు.