వాయిదా పడిన వెంకటేశ్‌-త్రివిక్రమ్‌ సినిమా ఆదర్శ కుటుంబం

టాలీవుడ్‌లో మోస్ట్ అవైటెడ్ కాంబినేషన్‌గా తెరకెక్కుతున్న విక్టరీ వెంకటేష్, మాటల మాంత్రికుడు త్రివిక్రమ్‌ శ్రీనివాస్‌ కలయికపై భారీ అంచనాలు నెలకొన్నాయి. వీరిద్దరి కాంబినేషన్‌లో రూపొందుతున్న ఫుల్ లెంగ్త్‌ ఫన్‌ అండ్‌ యాక్షన్‌ ఎంటర్‌టైనర్‌ ‘ఆదర్శ కుటుంబం హౌస్‌ నెం: 47 – ఏకే 47’లో కన్నడ నటి శ్రీనిధి శెట్టి హీరోయిన్‌గా నటిస్తోంది. డింపుల్‌ హయాతీ, నివేదా పేతురాజ్‌ ప్రత్యేక గీతంలో సందడి చేయనున్నారు. హారిక అండ్‌ హాసిని క్రియేషన్స్‌ బ్యానర్‌పై భారీ బడ్జెట్‌తో తెరకెక్కుతున్న ఈ చిత్రానికి ఎస్‌.ఎస్‌. తమన్‌ సంగీతం అందిస్తున్నారు. ఈ సినిమాను అక్టోబర్‌ 2, 2026న ప్రపంచవ్యాప్తంగా విడుదల చేయనున్నట్లు మేకర్స్‌ గతంలో ప్రకటించారు.

అయితే గత కొద్ది రోజులుగా సినిమా విడుదల వాయిదా పడబోతుందంటూ సోషల్‌ మీడియాలో ప్రచారం జరిగింది. తాజాగా నిర్మాత నాగవంశీ ఈ వార్తలను నిజం చేస్తూ సినిమా వాయిదా పడిన విషయాన్ని అధికారికంగా ప్రకటించారు. ‘ఆదర్శ కుటుంబం’ ద్వారా ప్రేక్షకులకు అందించాలనుకున్న వినోదం, అద్భుతమైన అనుభూతిని మరింత మెరుగ్గా అందించేందుకు కొంత అదనపు సమయం అవసరమైందని తెలిపారు. దీంతో ఈ సినిమా అక్టోబర్‌ 9, 2026న ప్రపంచవ్యాప్తంగా గ్రాండ్‌గా థియేటర్లలో విడుదల కానుంది. అలాగే సెప్టెంబర్‌ 22న విడుదల కావాల్సిన ‘నారాయణమ్మ’ పాట కూడా వాయిదా పడింది. ఈ ప్రత్యేక గీతాన్ని వచ్చే వారాంతంలో విడుదల చేయనున్నట్లు నాగవంశీ స్పష్టం చేశారు.