‘టాక్సిక్’పై విమర్శలకు యష్ సమాధానం

రాకింగ్‌ స్టార్‌ యశ్‌ హీరోగా, గీతూ మోహన్‌దాస్‌ దర్శకత్వంలో తెరకెక్కుతున్న పాన్‌ ఇండియా చిత్రం ‘టాక్సిక్‌’పై విడుదలైన ప్రచార చిత్రాలు, టీజర్‌, ట్రైలర్‌కు మిశ్రమ స్పందన వచ్చింది. సినిమాలో మహిళలను తప్పుగా చూపించారని, అశ్లీలత, పురుషాధిక్యత ఎక్కువగా ఉందంటూ కొందరు విమర్శలు చేశారు. ఈ విమర్శలపై తాజాగా స్పందించిన యశ్‌.. తాను ఎప్పుడూ అశ్లీలతను ప్రోత్సహించనని స్పష్టం చేశారు. సన్నిహిత సన్నివేశాలకూ ఓ పరిమితి ఉంటుందని, వాటిని కళాత్మకంగా తెరకెక్కించాల్సిన అవసరం ఉందన్నారు.

యశ్‌ మాట్లాడుతూ.. ‘టాక్సిక్‌’లో యువత, వారి ఆలోచనలు, పెద్దలతో వారికి ఎదురయ్యే విభేదాలు, పాత నిబంధనలపై వారి ప్రశ్నలను ప్రధానంగా చర్చించినట్లు తెలిపారు. సినిమాలో భావోద్వేగాలకు ఎంతో ప్రాధాన్యం ఉందని, ప్రేక్షకులు సినిమా చూసిన తర్వాత ఇది ప్రధానంగా యువత కోసం రూపొందించిన కథ అని అర్థం చేసుకుంటారని ధీమా వ్యక్తం చేశారు. ‘కేజీఎఫ్‌’ ఫ్రాంచైజీ తర్వాత యశ్‌ నటిస్తున్న ఈ చిత్రంలో కియారా అడ్వాణీ, నయనతార, హ్యూమా ఖురేషీ, తారా సుతారియా, రుక్మిణి వసంత్‌ కీలక పాత్రల్లో నటిస్తున్నారు. డ్రగ్స్‌ మాఫియా నేపథ్యంలో తెరకెక్కుతున్న ఈ చిత్రం ఆగస్టు 26న ప్రేక్షకుల ముందుకు రానుంది.