‘మైఖేల్’ ఓటీటీ రిలీజ్ డేట్ ఫిక్స్.. ఎక్కడ చూడొచ్చంటే?

పాప్ సంగీత ప్రపంచాన్ని శాశ్వతంగా మార్చిన లెజెండరీ గాయకుడు మైఖేల్ జాక్సన్ జీవిత కథ ఆధారంగా రూపొందిన హాలీవుడ్ బయోపిక్ ‘మైఖేల్’ ఇప్పుడు ఓటీటీ ప్రేక్షకుల ముందుకు రానుంది. థియేటర్లలో మంచి ఆదరణ పొందిన ఈ చిత్రం ఆగస్టు 29 నుంచి జియోహాట్‌స్టార్‌లో ఇంగ్లీష్, హిందీ భాషల్లో స్ట్రీమింగ్ కానుంది. ప్రముఖ దర్శకుడు ఆంటోయిన్ ఫుక్వా తెరకెక్కించిన ఈ సినిమాలో మైఖేల్ జాక్సన్ మేనల్లుడు జాఫర్ జాక్సన్ ప్రధాన పాత్రలో నటించి తన నటనతో విశేష ప్రశంసలు అందుకున్నారు.

ఈ చిత్రంలో జో జాక్సన్ పాత్రలో కోల్‌మన్ డొమింగో, కేథరిన్ జాక్సన్ పాత్రలో నియా లాంగ్ కనిపించారు. ఇప్పటివరకు అమెజాన్ ప్రైమ్ వీడియో, ఆపిల్ టీవీ వంటి ప్లాట్‌ఫారమ్‌లలో రెంటల్ విధానంలో మాత్రమే అందుబాటులో ఉన్న ఈ సినిమా, ఇప్పుడు జియోహాట్‌స్టార్ సబ్‌స్క్రైబర్లకు అదనపు చార్జీలు లేకుండా అందుబాటులోకి రానుంది. దీంతో మైఖేల్ జాక్సన్ జీవితాన్ని మరింత మంది ప్రేక్షకులు మరోసారి ఆస్వాదించే అవకాశం లభించనుంది.