బిగ్‌బాస్ ఇంట్లోకి శ్వేత ఫ్యామిలీ..

బిగ్‌బాస్ తెలుగు 10లో పదో వారం ఫ్యామిలీ వీక్ సందడి మొదలైంది. ఇప్పటికే నరేష్ కోసం అతని తమ్ముడు హౌస్‌లోకి వచ్చినట్లు ప్రోమో ద్వారా తెలిసింది. తాజాగా విడుదలైన ప్రోమోలో శ్వేత తండ్రి, చెల్లి బిగ్‌బాస్ ఇంట్లోకి అడుగుపెట్టినట్లు కనిపిస్తోంది. మరోవైపు హౌస్‌లో ‘బీబీ స్కూల్’ టాస్క్ కొనసాగుతోంది. ముకేష్, త్రిగుణ్, శివ్, ఆర్కే, రామ్ ప్రసాద్, సుధీర్ తదితరులు విద్యార్థులుగా మారగా, నరేష్ హెడ్‌మాస్టర్ పాత్రలో కనిపిస్తున్నాడు. ఈ టాస్క్‌లో భాగంగా వర్షిణి టీచర్‌గా ఎంట్రీ ఇచ్చినట్లు ప్రోమోలో చూపించారు.

వర్షిణిని పరిచయం చేస్తూ నరేష్.. ‘టీచర్ పేరు మిస్టరీ.. టీచ్ చేసేది కెమిస్ట్రీ’ అంటూ సరదాగా వ్యాఖ్యానిస్తాడు. ఆ సమయంలో టీచర్‌పై ఎవరో పేపర్ విసరడం నవ్వులు పూయిస్తుంది. అనంతరం వర్షిణి రాసిన కెమిస్ట్రీ ఫార్ములాలోని తప్పులను త్రిగుణ్ గుర్తించి కౌంటర్ ఇస్తాడు. ఇంతలో శ్వేతను ఫ్రీజ్ చేయాలని బిగ్‌బాస్ ఆదేశించి, రెండు కుక్కపిల్లలు ఉన్న ఫొటోను చూపిస్తాడు. ఆ ఫొటో చూసిన శ్వేత భావోద్వేగానికి గురై కన్నీళ్లు పెట్టుకుంటుంది. ఆమెను హౌస్‌మేట్స్ ఓదార్చే సమయంలో బిగ్‌బాస్ అందరినీ ఫ్రీజ్ చేయమని చెబుతాడు. ఇక రాబోయే ఎపిసోడ్స్‌లో ముకేష్, త్రిగుణ్ కుటుంబ సభ్యుల ఎంట్రీలు ఉండవచ్చనే ఆసక్తి నెలకొంది.