ఇండోనేషియా మాస్టర్స్ సెమీస్‌లోకి అన్మోల్ ఖర్బ్...

భారత్‌కు చెందిన మూడో సీడ్ అన్మోల్ ఖర్బ్ ఇండోనేషియా మాస్టర్స్ సూపర్ 100 బ్యాడ్మింటన్ టోర్నీలో అద్భుత ప్రదర్శనతో సెమీఫైనల్లోకి ప్రవేశించింది. శుక్రవారం జరిగిన క్వార్టర్‌ఫైనల్‌లో తైపీకి చెందిన హువాంగ్ చింగ్‌తో అన్మోల్ హోరాహోరీగా తలపడింది. తొలి గేమ్‌ను 21-14తో గెలిచిన ఆమె, రెండో గేమ్‌ను 13-21తో కోల్పోయింది. అయితే నిర్ణయాత్మక మూడో గేమ్‌లో 21-17తో విజయం సాధించి సెమీస్ బెర్త్ ఖరారు చేసుకుంది.

మరో క్వార్టర్‌ఫైనల్‌లో భారత షట్లర్ అస్మితకు నిరాశ ఎదురైంది. చైనాకు చెందిన జు వెన్ జిన్‌తో జరిగిన మ్యాచ్‌లో అస్మిత 10-21, 18-21తో వరుస గేముల్లో ఓటమి పాలైంది. దీంతో టోర్నీలో ఆమె ప్రయాణం ముగిసింది. మరోవైపు అన్మోల్ సెమీఫైనల్లోనూ ఇదే జోరును కొనసాగించి టైటిల్ దిశగా ముందుకు సాగాలని అభిమానులు ఆశిస్తున్నారు.