ఆసియా గేమ్స్‌లో వసతి గందరగోళం..

జపాన్‌లో జరుగుతున్న 2026 ఆసియా గేమ్స్‌లో భారత బృందానికి ఎదురవుతున్న వసతి సంబంధిత సమస్యలు మరోసారి చర్చనీయాంశమయ్యాయి. భారత జిమ్నాస్ట్‌ ప్రణతి నాయక్‌, ఆమె కోచ్‌ అశోక్‌ మిశ్రాకు క్రూయిజ్‌ షిప్‌లో ఒకే గది కేటాయించినట్లు సమాచారం. ఈ విషయాన్ని వెంటనే నిర్వాహకుల దృష్టికి తీసుకెళ్లినా సమస్య గంటల తరబడి పరిష్కారం కాలేదని తెలుస్తోంది. చివరకు భారత ఒలింపిక్‌ అసోసియేషన్‌ (IOA) జోక్యం చేసుకోవడంతో రాత్రి సుమారు 1:30 గంటలకు ఇద్దరికీ వేర్వేరు గదులు కేటాయించారు.

అయితే అక్కడితో సమస్య ముగియలేదు. వేరు గది తాళాల కోసం వెళ్లిన అశోక్‌ మిశ్రా పేరును హోటల్‌ సిబ్బంది రికార్డుల్లో గుర్తించలేకపోయారు. అధికారిక రికార్డుల్లో ఆయన పేరులోని ‘I’ అక్షరం నమోదు కాకపోవడంతో ఈ సమస్య తలెత్తినట్లు అధికారులు వెల్లడించారు. వివరాలను సరిచేసి అక్రిడిటేషన్‌ను ధ్రువీకరించేందుకు మరో 45 నిమిషాలు పట్టింది. దీంతో మిశ్రా తన గదికి చేరేసరికి రాత్రి 2 గంటలు దాటినట్లు సమాచారం. భారత బృందం జపాన్‌ చేరినప్పటి నుంచి వసతి, చెక్‌-ఇన్‌ తదితర అంశాల్లో పలు సమస్యలు ఎదురైనట్లు నివేదికలు పేర్కొంటున్నాయి.