రిటైర్మెంట్ ప్రశ్నకు హర్మన్‌ప్రీత్ కౌర్ అదిరిపోయే కౌంటర్

భారత మహిళల క్రికెట్ జట్టు కెప్టెన్ హర్మన్‌ప్రీత్ కౌర్ ఐసీసీ మహిళల టీ20 ప్రపంచకప్ 2026కు ముందు తన చమత్కారమైన సమాధానంతో వార్తల్లో నిలిచారు. లండన్‌లో జరిగిన కెప్టెన్ల మీడియా సమావేశంలో ఓ జర్నలిస్ట్, రాబోయే ప్రపంచకప్ తనకు చివరిదేనా అని ప్రశ్నించగా, హర్మన్‌ప్రీత్ వెంటనే “ఎందుకు? నేను రిటైర్ కావాలని మీరు అనుకుంటున్నారా?” అంటూ ఎదురుప్రశ్నించారు. ఆమె సమాధానంతో అక్కడున్న వారంతా నవ్వుల్లో మునిగిపోయారు.

ఈ వీడియో సోషల్ మీడియాలో వైరల్‌గా మారగా, అభిమానులు హర్మన్‌ప్రీత్ సమయస్ఫూర్తిని ప్రశంసిస్తున్నారు. చాలా మంది ఈ ఘటనను మాజీ భారత కెప్టెన్ ఎంఎస్ ధోనీ రిటైర్మెంట్ ప్రశ్నకు ఇచ్చిన ప్రసిద్ధ సమాధానంతో పోలుస్తున్నారు. ఇప్పటికే వన్డే ప్రపంచకప్ విజయోత్సాహంలో ఉన్న భారత మహిళల జట్టు, ఇప్పుడు తొలి టీ20 ప్రపంచకప్ టైటిల్‌పై కన్నేసింది. హర్మన్‌ప్రీత్ నాయకత్వంలో టీమిండియా చరిత్ర సృష్టిస్తుందా అనే ఆసక్తి అభిమానుల్లో నెలకొంది.