వైభవ్‌ సూర్యవంశీకి ఈసారైనా ఛాన్స్‌ దక్కేనా?..

అఫ్గానిస్థాన్‌తో తొలి రెండు టీ20ల్లో విజయం సాధించిన టీమ్‌ఇండియా.. మూడో, చివరి మ్యాచ్‌లోనూ గెలిచి సిరీస్‌ను 3-0తో క్లీన్‌స్వీప్‌ చేయాలని చూస్తోంది. దిల్లీలోని అరుణ్‌ జైట్లీ స్టేడియంలో సెప్టెంబర్‌ 17న ఈ మ్యాచ్‌ జరగనుంది. ఇప్పటికే సిరీస్‌ను భారత్‌ సొంతం చేసుకోవడంతో తుది జట్టులో కొన్ని మార్పులు చేసే అవకాశం ఉంది. తొలి రెండు మ్యాచ్‌ల్లో ఆడే అవకాశం రాని యువ ఓపెనర్‌ వైభవ్‌ సూర్యవంశీకి ఈ మ్యాచ్‌లో ఛాన్స్‌ దక్కుతుందా అనేది ఆసక్తికరంగా మారింది. 15 ఏళ్ల వైభవ్‌ భారత జట్టులో ఉన్నప్పటికీ తొలి రెండు టీ20ల్లో తుది జట్టులో చోటు దక్కించుకోలేకపోయాడు.

సిరీస్‌లో భారత బ్యాటింగ్‌ విభాగం మంచి ప్రదర్శన కనబరిచింది. అభిషేక్‌ శర్మ, ఇషాన్‌ కిషన్‌తో పాటు రెండో టీ20లో సంజు శాంసన్‌ 22 బంతుల్లో 57 పరుగులతో మెరిశాడు. బౌలింగ్‌లోనూ భారత్‌ ప్రత్యర్థిపై ఒత్తిడి కొనసాగించినప్పటికీ.. ఇన్నింగ్స్‌ చివర్లో పరుగులను నియంత్రించడంపై మరింత దృష్టి పెట్టాల్సి ఉంది. మరోవైపు వైట్‌వాష్‌ను తప్పించుకోవాలంటే అఫ్గానిస్థాన్‌కు రహ్మనుల్లా గుర్బాజ్‌, కెప్టెన్‌ ఇబ్రహీం జాద్రాన్‌, అజ్మతుల్లా ఒమర్జాయ్‌, మహ్మద్‌ నబి, రషీద్‌ ఖాన్‌ కీలకంగా మారనున్నారు.