శ్రీలంక టూర్‌కు టీమిండియా మాస్టర్ ప్లాన్..

శ్రీలంకతో ఆగస్టు 15 నుంచి ప్రారంభమయ్యే రెండు టెస్టుల సిరీస్‌కు ముందు భారత జట్టు కీలక నిర్ణయం తీసుకుంది. అక్కడి స్పిన్‌కు అనుకూలించే పిచ్‌లపై భారత బ్యాటర్లు మెరుగ్గా సిద్ధమయ్యేలా విప్రాజ్ నిగమ్, తనుష్ కొటియన్, హర్ష్ దూబె, శివాంగ్ కుమార్లను నెట్ బౌలర్లుగా ఎంపిక చేసింది. ఈ నలుగురు యువ స్పిన్నర్లు సోమవారం భారత జట్టుతో కలిసి శ్రీలంకకు బయలుదేరి, నెట్స్‌లో బ్యాటర్లకు బౌలింగ్ చేయనున్నారు.

ఇటీవల ఇండియా-ఏ తరఫున శ్రీలంకలో జరిగిన ముక్కోణపు సిరీస్‌లో విప్రాజ్ నిగమ్ ఆకట్టుకున్నాడు. ప్రధాన జట్టులో ఇప్పటికే రవీంద్ర జడేజా, కుల్‌దీప్ యాదవ్ వంటి అనుభవజ్ఞులైన స్పిన్నర్లతో పాటు మానవ్ సుతార్, సరాంశ్ జైన్ కూడా ఉన్నారు. టెస్టు సిరీస్‌కు ముందు ఆగస్టు 7 నుంచి కొలంబోలో శ్రీలంక ఎలెవన్‌తో మూడు రోజుల వార్మప్ మ్యాచ్ ఆడనుంది. తొలి టెస్టు గాలెలో ఆగస్టు 15న, రెండో టెస్టు ఆగస్టు 23 నుంచి కొలంబోలో ప్రారంభం కానుంది.