సూపర్ డైవ్‌తో సింగిల్ హ్యాండ్ క్యాచ్.. విరాట్ కోహ్లీ ఫీల్డింగ్‌కు ఫ్యాన్స్ ఫిదా!

న్యూజిలాండ్‌తో ఆక్లాండ్ వేదికగా జరిగిన తొలి వన్డేలో విరాట్ కోహ్లీ తన అద్భుతమైన ఫీల్డింగ్‌తో అందరినీ ఆకట్టుకున్నాడు. అన్షుల్ కాంబోజ్ వేసిన 29వ ఓవర్‌లో ఈ క్యాచ్ నమోదైంది. ఆ ఓవర్ మూడో బంతిని కాంబోజ్ ఫుల్ లెంగ్త్‌గా వేయగా, నాథన్ స్మిత్ డ్రైవ్ షాట్ ఆడేందుకు ప్రయత్నించాడు. అయితే బంతి బ్యాట్ ఎడ్జ్ తీసుకుని సెకండ్ స్లిప్‌లో కుడివైపు తక్కువ ఎత్తులో దూసుకొచ్చింది. అక్కడే ఫీల్డింగ్ చేస్తున్న కోహ్లీ వేగంగా స్పందించి కుడివైపు సూపర్ డైవ్ చేస్తూ ఒంటి చేత్తో బంతిని అందుకున్నాడు. దీంతో ఒక్క పరుగు చేసిన నాథన్ స్మిత్ పెవిలియన్ చేరాడు. క్యాచ్ పట్టిన వెంటనే కోహ్లీ సంబరాలు చేసుకున్నాడు.

అయితే బంతి నేలకు తాకిందా లేదా అనే అనుమానంతో మైదానంలోని అంపైర్లు థర్డ్ అంపైర్ సమీక్ష కోరారు. రీప్లేలను పరిశీలించిన థర్డ్ అంపైర్ బంతి నేలకు తాకలేదని నిర్ధారించి స్మిత్‌ను ఔట్‌గా ప్రకటించాడు. దీంతో భారత ఆటగాళ్లు సంబరాలు చేసుకున్నారు. కోహ్లీ అద్భుతమైన ఫీల్డింగ్‌ను కామెంటేటర్లు ప్రశంసించగా, ఈ క్యాచ్ వీడియో సోషల్ మీడియాలో వైరల్‌గా మారింది. నెటిజన్లు కూడా కోహ్లీ వేగం, సమయస్ఫూర్తి, ఫీల్డింగ్ నైపుణ్యాన్ని కొనియాడుతున్నారు.