ఫ్లిప్‌కార్ట్ పార్శిల్‌లో విక్రయదారుడి నుంచి ఓ వింత లేఖ

ఆన్‌లైన్ షాపింగ్ దిగ్గజం ఫ్లిప్‌కార్ట్‌లో ఓ కస్టమర్‌కు వింత అనుభవం ఎదురైంది. తాను ఆర్డర్ చేసిన టీ-షర్ట్ పార్శిల్‌లో, విక్రయదారుడు రాసిన ఓ అభ్యర్థన లేఖ చూసి అతను ఆశ్చర్యపోయాడు. ఈ ఘటన ప్రస్తుతం సోషల్ మీడియాలో వైరల్‌గా మారింది.వివరాల్లోకి వెళ్తే, కల్పేష్ అనే ఓ నెటిజన్ ఫ్లిప్‌కార్ట్‌లో టీ-షర్ట్ ఆర్డర్ చేశాడు. పార్శిల్ ఓపెన్ చేయగా, అందులో టీ-షర్ట్‌తో పాటు ఓ చేతిరాత నోట్ ఉంది. దానిపై, "దయచేసి ఈ ప్రొడక్ట్ రిటర్న్ చేయొద్దు సార్. నేను ఇప్పటికే నష్టాల్లో ఉన్నాను... దయచేసి రిటర్న్ వద్దు" అని రాసి ఉంది. ఈ నోట్‌ను ఫోటో తీసి కల్పేష్ తన ‘ఎక్స్’ ఖాతాలో పోస్ట్ చేయడంతో అది క్షణాల్లో వైరల్ అయింది.

ఈ పోస్ట్‌పై నెటిజన్ల నుంచి మిశ్రమ స్పందనలు వస్తున్నాయి. చాలా మంది చిన్న విక్రయదారుల పట్ల సానుభూతి వ్యక్తం చేశారు. ఫ్లిప్‌కార్ట్ వంటి ప్లాట్‌ఫామ్‌లలో రిటర్న్‌ల వల్ల అయ్యే అధిక ఖర్చులు, ఫీజుల భారం చిన్న వ్యాపారులపైనే పడుతుందని పలువురు కామెంట్ చేశారు. కొందరు కస్టమర్లు వాడిన వస్తువులను కూడా రిటర్న్ చేస్తుండటంతో తాము నష్టపోతున్నామని విక్రయదారులు వాపోతున్నట్లు చర్చ జరుగుతోంది. కొందరు దీన్ని సరదాగా తీసుకున్నప్పటికీ, చాలామంది ఇది విక్రయదారుడి ఆర్థిక ఇబ్బందులకు నిదర్శనమని అభిప్రాయపడ్డారు.ఏదేమైనా, ఈ చిన్న లేఖ ఆన్‌లైన్ మార్కెట్‌ప్లేస్‌లలో చిన్న వ్యాపారులు ఎదుర్కొంటున్న సవాళ్లను, ముఖ్యంగా రిటర్న్‌ల సమస్యను మరోసారి వెలుగులోకి తెచ్చింది.