నీట్‌ ఉద్యమానికి కీలక విజయం.. ధర్మేంద్ర ప్రధాన్‌ రాజీనామా

నీట్‌-యూజీ వివాదంపై దేశవ్యాప్తంగా కొనసాగిన విద్యార్థుల ఆందోళనల నేపథ్యంలో కేంద్ర విద్యాశాఖ మంత్రి ధర్మేంద్ర ప్రధాన్‌ శనివారం తన పదవికి రాజీనామా చేశారు. ప్రధాని నరేంద్ర మోదీకి పంపిన రాజీనామా లేఖలో గత పది రోజుల పరిణామాలు తనను తీవ్రంగా కలచివేశాయని పేర్కొన్నారు. విద్యార్థులు రాజకీయ, న్యాయపరమైన వివాదాల్లో చిక్కుకోకుండా పూర్తిగా చదువుపై దృష్టి పెట్టి తమ కెరీర్‌ను నిర్మించుకోవాలన్న ఉద్దేశంతోనే పదవి నుంచి వైదొలుగుతున్నట్లు తెలిపారు. పరిస్థితికి తాను బాధ్యత తీసుకున్నానని, బాధ్యత నుంచి ఎన్నడూ తప్పించుకోలేదని స్పష్టం చేశారు. ప్రధాన్‌ రాజీనామా ప్రకటన వెలువడిన వెంటనే దిల్లీలోని జంతర్‌మంతర్‌లో సీజేపీ మద్దతుదారులు సంబరాలు చేసుకున్నారు. దీన్ని విద్యార్థులు, ప్రజాస్వామ్యం సాధించిన విజయంగా సీజేపీ అభివర్ణించింది.

కేంద్ర మంత్రులు జె.పి.నడ్డా, జితేంద్ర సింగ్‌లతో జరిగిన చర్చల అనంతరం తమ మిగిలిన డిమాండ్లకు కూడా ప్రభుత్వం అంగీకరించిందని ప్రకటించిన కాక్రోచ్‌ జనతా పార్టీ 36 రోజుల ఆందోళనను విరమించింది. విద్యార్థులపై నమోదైన పోలీసు కేసుల ఉపసంహరణతో పాటు నీట్‌ వివాదంతో ముడిపడి ఆత్మహత్యలకు పాల్పడిన విద్యార్థుల కుటుంబాలకు నిబంధనల ప్రకారం పరిహారం అందించేందుకు ప్రభుత్వం హామీ ఇచ్చినట్లు సీజేపీ ప్రతినిధులు తెలిపారు. సీజేపీ వ్యవస్థాపకుడు అభిజీత్‌ దీప్కే ఈ విజయాన్ని వ్యవస్థలో మార్పు కోసం సాగించే పోరాటంలో తొలి అడుగుగా అభివర్ణించారు. మరోవైపు ప్రతిపక్షాలు ప్రధాన్‌ రాజీనామాను విద్యార్థుల నిరంతర పోరాటానికి దక్కిన విజయంగా పేర్కొన్నాయి. పరీక్షల వ్యవస్థలో సంస్కరణలు, ప్రశ్నపత్రాల లీకేజీల నివారణ, జవాబుదారీతనంపై తదుపరి చర్చలు కొనసాగనున్నాయి.