నాంపల్లిలో చేప ప్రసాదం సందడి.. భారీగా తరలివచ్చిన భక్తులు

హైదరాబాద్‌లోని నాంపల్లి ఎగ్జిబిషన్ గ్రౌండ్‌లో చేప ప్రసాదం పంపిణీ కార్యక్రమం భారీగా కొనసాగుతోంది. రాష్ట్రం నలుమూలల నుంచి వచ్చిన ప్రజలు చేప ప్రసాదం కోసం పెద్ద ఎత్తున తరలివచ్చారు. రాత్రి నుంచే ప్రారంభమైన ఈ కార్యక్రమానికి విశేష స్పందన లభించగా, ఇప్పటివరకు 50 వేల మందికి పైగా చేప ప్రసాదం పంపిణీ చేసినట్లు అధికారులు తెలిపారు. భక్తుల రద్దీని దృష్టిలో ఉంచుకుని ప్రత్యేక ఏర్పాట్లు చేశారు.

ఈ కార్యక్రమం కోసం ఫిషరీస్ శాఖ సుమారు 3 లక్షల చేప పిల్లలను అందుబాటులో ఉంచింది. వీఐపీలు, దివ్యాంగులు, వృద్ధుల కోసం ప్రత్యేక కౌంటర్లు ఏర్పాటు చేయగా, అవసరాలకు అనుగుణంగా అదనపు చేప పిల్లలను తీసుకురావడానికి కూడా ప్రణాళికలు సిద్ధం చేశారు. చేప ప్రసాదం పంపిణీ కార్యక్రమం రాత్రి 9 గంటల వరకు కొనసాగనుంది.