‘జగన్మాత దివ్య దర్శన్’ టికెట్లు రేపు విడుదల

విజయవాడ ఇంద్రకీలాద్రిపై కొలువుదీరిన శ్రీ దుర్గా మల్లేశ్వర స్వామివారి దేవస్థానంలో అక్టోబర్ 11 నుంచి 20 వరకు జరగనున్న దసరా శరన్నవరాత్రి ఉత్సవాల సందర్భంగా భక్తుల కోసం ‘జగన్మాత దివ్య దర్శన్’ ప్రత్యేక సదుపాయాన్ని అందుబాటులోకి తెచ్చినట్లు ఆలయ ఈవో వి.కె. శీనా నాయక్ తెలిపారు. ఎలాంటి సిఫార్సులు, ప్రోటోకాల్ అవసరం లేకుండా సామాన్య భక్తులు అమ్మవారిని సులభంగా దర్శించుకునేందుకు ఈ ఏర్పాట్లు చేసినట్లు వెల్లడించారు. ఈ ప్రత్యేక దర్శనానికి రోజుకు 1,000 టికెట్లు మాత్రమే అందుబాటులో ఉంటాయని, ఒక్కో టికెట్ ధర రూ.1,000గా నిర్ణయించినట్లు పేర్కొన్నారు.

ఈ టికెట్లను ఆంధ్రప్రదేశ్ ప్రభుత్వ ‘మన మిత్ర’ వాట్సాప్ సేవ 9552300009 ద్వారా విడతల వారీగా విడుదల చేయనున్నారు. తొలి విడత టికెట్లను రేపు మధ్యాహ్నం 2 గంటలకు అందుబాటులోకి తీసుకురానున్నారు. టికెట్ పొందిన భక్తులకు కుమ్మరిపాలెం సెంటర్‌లోని టీటీడీ స్థలం నుంచి కొండపైకి ఉచిత బస్సు సదుపాయం కల్పిస్తారు. ఓం టర్నింగ్ వద్ద ఏర్పాటు చేసిన ప్రత్యేక క్యూ మార్గం ద్వారా ఆలయంలోని బంగారు వాకిలి (ముఖ మండపం) నుంచి అమ్మవారి దర్శనం కల్పిస్తారు. ఈ దర్శనాలు ప్రతిరోజూ ఉదయం 9 నుంచి సాయంత్రం 5 గంటల వరకు కొనసాగుతాయని, నైవేద్య సమయాల్లో మినహాయింపు ఉంటుందని ఈవో తెలిపారు.