బీజేపీతో పొత్తు ప్రసక్తే లేదు - కేటీఆర్

బీజేపీతో బీఆర్‌ఎస్‌కు ఎలాంటి పొత్తు ఉండబోదని ఆ పార్టీ వర్కింగ్ ప్రెసిడెంట్‌ కేటీఆర్‌ స్పష్టం చేశారు. రెండు పార్టీల భావజాలాలు పూర్తిగా భిన్నమైనవని తెలిపారు. కొచ్చిలో జరిగిన ఇండియా టుడే కాంక్లేవ్ సౌత్ 2026లో మాట్లాడిన కేటీఆర్‌, బీఆర్‌ఎస్‌ ఇప్పటివరకు బీజేపీతో పొత్తు పెట్టుకోలేదని, తెలంగాణ అసెంబ్లీ ఎన్నికల్లో స్వతంత్రంగానే పోటీ చేసిందని గుర్తుచేశారు. ఎన్నికల సంఘం వ్యవహారాలపై స్వతంత్ర న్యాయ విచారణ జరపాలని డిమాండ్‌ చేశారు. ఓటర్ల జాబితా ప్రత్యేక సమగ్ర సవరణ ప్రక్రియలో పారదర్శకత అవసరమని, జనాభా ప్రాతిపదికన జరిగే నియోజకవర్గాల పునర్విభజన దక్షిణాది రాష్ట్రాల ప్రాతినిధ్యంపై ప్రభావం చూపవచ్చని ఆందోళన వ్యక్తం చేశారు.

నిరుద్యోగ సమస్యపై కేంద్రంలోని బీజేపీ, తెలంగాణలోని కాంగ్రెస్‌ ప్రభుత్వాలను కేటీఆర్‌ విమర్శించారు. యువత ఎదుర్కొంటున్న అసలు సమస్యల నుంచి దృష్టి మళ్లించేందుకు మతపరమైన అంశాలను తెరపైకి తీసుకొస్తున్నారని ఆయన ఆరోపించారు. గతంలో కేసీఆర్‌ పలు ప్రాంతీయ పార్టీల నేతలతో బీజేపీ, కాంగ్రెస్‌లకు సమదూరంగా ఉండే ప్రత్యామ్నాయ కూటమిపై చర్చలు జరిపారని తెలిపారు. 2029 సార్వత్రిక ఎన్నికలకు ఇంకా సమయం ఉన్నందున రాజకీయ సమీకరణాలు మారవచ్చని అన్నారు. తెలంగాణలో కాంగ్రెస్‌ ప్రభుత్వంపై ప్రజల్లో అసంతృప్తి పెరుగుతోందని ఆరోపించిన కేటీఆర్‌, భవిష్యత్తులో బీఆర్‌ఎస్‌ బలంగా పుంజుకుంటుందని ధీమా వ్యక్తం చేశారు.