తెలంగాణకు భారీ వర్షాల హెచ్చరిక..

తెలంగాణ రాష్ట్రంలో ఈ నెల 18 నుంచి 20వ తేదీ మధ్య భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. రానున్న మూడు నుంచి నాలుగు రోజుల్లో రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని పేర్కొంది. ప్రస్తుతం నైరుతి రుతుపవనాలు రాష్ట్రంలో నెమ్మదిగా ముందుకు సాగుతున్నాయని, మరో నాలుగు నుంచి ఐదు రోజుల్లో తెలంగాణ అంతటా విస్తరించే అవకాశముందని తెలిపింది.

ఇవాళ, రేపు, ఎల్లుండి కొన్ని జిల్లాల్లో మోస్తరు వర్షాలతో పాటు గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని వాతావరణ శాఖ పేర్కొంది. ప్రజలు వాతావరణ పరిస్థితులను గమనిస్తూ అవసరమైన జాగ్రత్తలు తీసుకోవాలని అధికారులు సూచించారు. ముఖ్యంగా భారీ వర్షాలు, బలమైన గాలులు వీచే ప్రాంతాల్లో అప్రమత్తంగా ఉండాలని హెచ్చరించారు.