శ్రీశైలం దేవస్థానంలో ఇద్దరు శాశ్వత ఉద్యోగులపై సస్పెన్షన్ వేటు

నంద్యాల జిల్లాలోని శ్రీశైలం దేవస్థానంలో ఇద్దరు శాశ్వత ఉద్యోగులపై సస్పెన్షన్ వేటు పడింది. దుకాణాల లీజు బకాయిల వసూళ్లలో నిర్లక్ష్యం వహించినట్లు ఆరోపణలు రావడంతో రెవెన్యూ విభాగానికి చెందిన ఓ ఉద్యోగిని సస్పెండ్ చేశారు. మరో ఉద్యోగిపై ఓటెండర్‌కు సంబంధించిన వ్యవహారంలో తప్పుడు పత్రాలు సమర్పించిన అంశాన్ని పరిశీలించలేదనే ఆరోపణల నేపథ్యంలో చర్యలు తీసుకున్నారు. ఈ మేరకు దేవస్థానం ఈఓ శ్రీనివాసరావు ఇద్దరు ఉద్యోగులను సస్పెండ్ చేస్తూ ఉత్తర్వులు జారీ చేశారు.

అదే సమయంలో 2024 నుంచి ఇప్పటివరకు దేవస్థాన రెవెన్యూ విభాగంలో పనిచేసిన అధికారులు, సిబ్బందికి ఈఓ ఛార్జ్ మెమోలు జారీ చేశారు. దుకాణాల లీజు బకాయిల వసూళ్లు, సంబంధిత పరిపాలనా వ్యవహారాల్లో నిర్లక్ష్యం లేదా విధి నిర్వహణలో లోపాలపై వివరాలు కోరినట్లు తెలుస్తోంది. దేవస్థాన పరిపాలనలో బాధ్యత, జవాబుదారీతనాన్ని పెంచే చర్యల్లో భాగంగా ఈ నిర్ణయాలు తీసుకున్నట్లు అధికారులు తెలిపారు.